Яр Чаллыда «Витязь» олимпия резервы спорт мәктәбендә 21 яшькә кадәрге
яшүсмерләр арасында ТР һәм РФ атказанган төзүчесе, СССР Министрлар Советы премиясе лауреаты Марат Бибишев истәлегенә грек-рим көрәше буенча Идел буе федераль округы
беренчелеге ачылды.
Тантанада Чаллы шәһәре мэры Наил Мәһдиев, "Татарстан Республикасы муниципаль берәмлекләре Советы" Ассоциациясе рәисе, грек-рим көрәше
буенча СССР спорт мастеры, милли көрәш буенча Татарстан Республикасының
атказанган спорт мастеры Әгъзам Гобәйдуллин, ТР Дәүләт Советы депутаты, ТР грек-рим көрәше федерациясенең беренче вице-президенты Марсель Мингалимов һәм башкалар катнашты.
Спорт бәйрәмендә катнашучыларны Наил Мәһдиев сәламләде. "Безгә шәһәрдә грек-рим көрәше буенча Идел буе федераль округы беренчелеген алтынчы тапкыр кабул итү бәхете насыйп булды. Бүген бу залда Россиянең 14 төбәгеннән иң яхшы көрәшчеләр җыелды. Без сезнең һәрберегез өчен җан атачакбыз, барыгызга да уңышлар юлдаш булсын", - диде ул.
Әгъзам Гобәйдуллин барысын да ярышлар башлану белән котлады.
Ярышларда 180 спортчы катнаша. Татарстан җыелма командасы 30 кешедән
тора, шулардан дүртесе М. Ш. Бибишев исемендәге «Витязь» олимпия резервының спорт мәктәбен
тәкъдим итә.
Чаллы мәктәбенең грек-рим көрәше бүлегендә алты тренер җитәкчелегендә
218 спортчы шөгыльләнә. Мәктәптә капиталь ремонт
ясалды.
При использовании информации просьба ссылаться на Управление информационной политики и по связям с общественностью.
Шимбә, 6 февраль 2021, 17:24