Яр Чаллыда 60 волонтер поликлиникаларга пациентлар өчен дарулар китерергә булыша

Яр Чаллыда "Орион" яшьләр үзәге базасында волонтерлар штабы эшли. Иреклеләр поликлиникаларга дару препаратларын пациентларга кадәр илтеп җиткерергә булышалар. "Бу штаб шәһәрдә иреклеләр һәм волонтерлар артериясе булып тора. Аның аша бөтен логистика, транспортлау һәм шәһәр поликлиникалары белән элемтә бара", – дип сөйләде бүген матбугат конференциясендә яшьләр белән эшләү идарәсе башлыгы Айзат Мәхмүтов. Бүгенге көндә Яр Чаллы шәһәрендә гаризалар буенча 60 волонтер эшли, аларның 35е - яшьләр сәясәте өлкәсеннән, 25е – студент-медиклар. Волонтерлар штабына заявкалар сигез поликлиникадан килә.

"Шәһәр җитәкчелеге ярдәме белән волонтерларга медикаментларны пациентларга кадәр китереп җиткерә алсыннар өчен транспорт карталары бирелде", - дип билгеләп үтте спикер һәм бер волонтер көнгә 6дан 12гә кадәр заявка алырга мөмкин дип өстәде. Волонтерлар барлык шәхси саклану чаралары белән тәэмин ителгән.

Волонтер килер алдыннан поликлиника вәкилләре пациентлар белән элемтәгә керә. Волонтерлар авырулар белән элемтәгә керми, медикаментларны ишек янында калдыра һәм аны китереп җиткерү турында фотоотчет ясый. Дарулар белән пакет эчендә, пациент имзаларга тиешле тапшыру акты бар. Имзалагач ул аны үзенең участок табибына тапшыра.