«Пациент һәрвакыт хаклы!» - диде Наил Мәһдиев шәһәрнең сәламәтлек саклау хезмәткәрләренә

Бүген "Энергетик" мәдәният сараенда шәһәрнең сәламәтлек саклау тармагының киңәйтелгән утырышы узды. Киңәшмәдә узган елга йомгак ясадылар һәм 2019 елга бурычлар һәм үсеш перспективаларын билгеләделәр. Очрашу шәһәр мэры Наил Мәһдиев, ТР сәламәтлек саклау министрының беренче урынбасары Альберт Осипов, ТР Дәүләт Советы депутаты Светлана Захарова катнашында узды.

Утырышта катнашучыларны 2018 елгы эшчәнлек нәтиҗәләре белән сәламәтлек саклау идарәсе җитәкчесе Нияз Фатыйхов таныштырды. Ул Яр Чаллы медицина оешмаларының индикатив күрсәткечләр буенча муниципаль берәмлекләр рейтингында өченче ел рәттән беренче урынны алуы турында сөйләде. Әйтик, автокала республикада туучылар саны үлүчеләр саныннан һәрвакыт артып киткән шәһәрләрнең берсе булып кала. 2018 ел нәтиҗәләре буенча халыкның табигый үсеше 2691 кешене тәшкил итте, ТР буенча – 2021 кеше.

Узган елның мөһим казанышларыннан Нияз Фатыйхов Ашыгыч медицина ярдәме хастаханәсе табиблары командасы «Ел табибы – Ак чәчәкләр 2018» конкурсының «Уникаль очрак» номинациясендә  финалга чыкты, аның нәтиҗәләре буенча Германиянең һәм Нидерландның иң яхшы клиникаларында стажировка узды, шулай ук 5 нче шәһәр хастаханәсе, КБМҮ, 6 нчы шәһәр шифаханәсе, 1 нче  стоматология шифаханәсе медицина ярдәмен күрсәтүнең югары дәрәҗәсен раслый торган ИСО 9001-2015 яраклылык сертификаты алды, дип билгеләде.

Автокалада онкология хезмәтенең эше турындагы доклад белән Яр Чаллы онкология диспансерының баш табибы Алмаз Хаҗиев чыгыш ясады. Аның сүзләренә караганда, 2018 елда шәһәрдә яман шеш авыруы узган ел белән чагыштырганда 8%ка кимрәк ачыкланган. Онкология авырулары арасында юан эчәк шеше беренче урынны алып тора.

Утырышка шәһәр мэры Наил Мәһдиев йомгак ясады. Шәһәр башлыгы тармак хезмәткәрләренә намуслы эшләре өчен рәхмәт белдерде һәм пациентларга карата мөнәсәбәттә аеруча да игътибарлы булырга өндәде. «Сез көн саен, сәгать, минут саен эшләмәсәгез, шәһәребезнең социаль-икътисадый үсешендә уңыш булмас иде. Сүз күп төрле дарулар, яңа җиһазлар турында гына бармый. Бу максатларга финанс ресурслары каралган. Шәһәр җитәкчелеге әлеге мәсьәләләргә җитди игътибар бирә. Сүз пациентларга мөнәсәбәт турында бара. Биредә бернинди финанс ресурслары да кирәкми. Пациентларга мөнәсәбәт авыруның һәрвакыт хаклы булуын аңлауда. Хаклы булмаган очракта да, пациент барыбер хаклы, чөнки ул ярдәм сорап килгән", - дип ассызыклады Наил Мәһдиев.

Моннан тыш, 2019 елда Яр Чаллыда урын өстендә ятучы авыруларга ярдәм күрсәтүне үстерү, ир-атлар сәламәтлеге кабинетларын булдыру, шулай ук беренчел сәламәтлек саклау челтәрендә эшне дәвам итү, шәһәр учреждениеләренең матди-техник базасын ныгыту планлаштырыла.