Наил Мәһдиев Ford Sollers компаниясенең кыскартуга эләккән хезмәткәрләре өчен яңа эш урыны табарга кушты

Бүген «эшлекле дүшәмбе» киңәшмәсендә шәһәр мэры Наил Мәһдиев Татарстан территориясендә җитештерү эшчәнлеген ябучы Ford Sollers компаниясенең 802 хезмәткәрен эш урыны белән тәэмин итәргә кушты. Шәһәр башлыгы Халыкны эш белән тәэмин итү үзәге директоры Татьяна Быдановадан эшсез калган һәр хезмәткәр белән шәхсән әңгәмә үткәрүләрен сорады.

"Бу кешеләрнең һәрберсенең хәле уникаль. Аларны аңларга, ишетергә кирәк. Кеше, килеп туган вәзгыятьне исәпкә алып, алга таба нәрсә эшләргә планлаштыра. Безнең шәһәрдә вакансияләр күп. Бүген сайлау мөмкинлеге бар, без  800дән артык кеше өчен КАМАЗ, Haier компаниясендә эш тәкъдим итә алабыз. Әзерлекле кадрлар кирәк булган предприятиеләрнең эштән азат ителүчеләр белән эшләү мөмкинлеге бар", - диде мэр.

Автокаланың Халыкны эш белән тәэмин итү үзәге директоры Татьяна Быданова хәбәр иткәнчә, Ford Sollers предприятиесе хезмәткәрләре штаты кимүгә бәйле рәвештә эштән китүе турында мәгълүмат 2 апрельдә билгеле булды: «802 хезмәткәрнең эштән азат ителүе турында исемлекләр тәкъдим ителгән. Бу гомуми саннан 94%ны тәшкил итә. Предприятиедә барлыгы 851 кеше һәм «Автокомпонентлар» компаниясендә 14 кеше эшли».

Хәзерге вакытта 150 кеше Алабуга мәйданчыгына күчереләчәк, 252 кеше Яр Чаллы шәһәре территориясендә әзерлек эшләре белән шөгыльләнәчәк.

"Предприятие хезмәткәрләрне яклау килешүе буенча чыгару турында Карар кабул итте. Хезмәткәрләргә 5,5тән 12 оклад күләмендә түләү тәкъдим ителәчәк. Бу-эш стажы белән бәйле. 5 елдан кимрәк эшләүчеләр  5,5 оклад, 15 елдан артык эшләгәннәр 12 оклад алачак", - дип аңлатты Татьяна Быданова.