Сугыш ветераннары өчен госпиталь «Яр Чаллыда эшлә!» акциясенә кушылды

"Яр Чаллыда эшлә!" шәһәр һөнәри юнәлеш бирүче акциясе кысаларында "Асылташ" балалар һәм яшүсмерләр өчен социаль приютында тәрбияләнүчеләр автокаланың «Сугыш ветераннары госпитале»ндә булдылар. Госпиталь хезмәткәрләре балаларга медицина оешмасының тарихын сөйләделәр һәм экскурсия үткәрделәр. Укучылар картотеканы карадылар, электр дәвалау, җылылык белән дәвалау, ЭКГ кабинетларында булдылар. Дәвалау физкультурасы кабинеты аларда аеруча зур кызыксыну уятты.

«Яр Чаллыда эшлә!» акциясе мәктәп укучылары һәм студентлар өчен һөнәри ориентлашуга, хәзерге вакытта шәһәребездә кирәкле һөнәр һәм белгечлекләрне популярлаштыруга, мәктәп укучыларын, студентларны һәм аларның әти-әниләрен автокала территориясендә эшчәнлек алып баручы предприятиеләр эше белән таныштыруга юнәлдерелгән.