Әлфия Когогина: Федераль бюджетка төзәтмәләр иҗтимагый әһәмиятле бурычларны хәл итүгә юнәлдерелгән

Дәүләт Думасы тарафыннан 2019 елга һәм 2020-2021 елларның планлы чорына федераль бюджетка төзәтмәләр өченче укылышта кабул ителде. Дәүләт Думасы депутаты, Икътисадый сәясәт, сәнәгать, инновацион үсеш һәм эшмәкәрлек комитеты рәисе урынбасары Әлфия Когогина инициативаны шәрехләде: «Соңгы укылыш бюджет чыгымнарын 256,5 млрд сумга арттыручы закон узды. Минем өчен кертелгән төзәтмәләрнең өч үзенчәлеген билгеләп үтү мөһим. Беренчедән, бу нәкъ менә нефть-газ табышлары күләменең фаразланган күрсәткечтән күбрәк булуы белән бәйле. Икенчедән, бюджетның өстәмә чыгымнары социаль характерда һәм алар актуаль иҗтимагый-әһәмиятле мәсьәләләрне хәл итүгә юнәлдерелгән. Өченчедән, без бер мандатлы округта сәламәтлек саклау, мәдәният һәм спорт объектларына өстәмә акча бүленүгә ирештек».

Бюджетка төзәтмәләр аның беренче дүрт айда үтәлешен исәпкә алып әзерләнгән иде. Керемнәр 20 трлн 174,9 млрд сум (205,6 млрд сумга үсеш), чыгымнар -18 трлн 293,7 млрд сум (256,5 млрд сумга үсеш) күздә тотыла. Профицит 1 трлн 881,2 млрд сум тәшкил итәчәк. Инфляция дәрәҗәсе буенча фараз үзгәрмәде һәм ул 4,3%тан артмый. Кабул ителгән үзгәрешләр социаль әһәмиятле бурычларны хәл итүгә юнәлдерелгән: өченче яки аннан соң баласы туган гаиләләргә ипотека кредитларын компенсацияләүгә, инсулин помпасын һәм дару препаратларын сатып алуга, Гадәттән тыш хәлләр министрлыгы коткаручыларының хезмәт хакын арттыруга, фатир алуда алданган өлешчеләргә ярдәм күрсәтүгә һәм башкаларга. Төбәкләрдәге юл фондларына ярдәм 34,4 млрд сум тәшкил итәчәк, федерация субъектлары бюджетның баланслылыгын тәэмин итүгә 30,9 млрд сум алачак.