Яр Чаллыда кайсы объектларны капиталь ремонт көтә?

«Эшлекле дүшәмбе»дә Башкарма комитет җитәкчесе урынбасары Илмир Исхаков Чаллы төзүчеләренең киләсе елларга планлаштырылган масштаблы бурычлары турында хәбәр итте. Быел "Витязь" олимпия резервы спорт мәктәбен капиталь ремонтлау планлаштырыла. Бу максатларга республика бюджетыннан 145,2 млн сум күләмендә финанслау бүлеп бирелгән. Шулай ук агымдагы елда «Энергетик» мәдәният сараенда 100 млн сумлык ремонт көтелә. ГЭС һәм Гренада бистәсенең мәдәният һәм ял паркында да төзекләндерү эшләре узачак. Ике ял зонасын реконструкцияләүгә республика бюджеты тарафыннан 247 млн сум бүлеп бирелгән.

Бүген Яр Чаллыда мөмкинлекләре чикләнгән балалар өчен 67 нче мәктәп, 11 нче урта гомуми белем бирү мәктәбе, Яр Чаллы сәнгать көллияте, Политехник көллият, тугыз балалар бакчасы капиталь ремонтлана. Социаль хезмәт күрсәтү һәм социаль яклау учреждениеләрен капиталь ремонтлау программасы буенча өч учреждение ремонтлана: "Перекресток" билгеле бер яшәү урыны һәм шөгыльләре булмаган затлар өчен социаль адаптация үзәге, "Асылташ" балигъ булмаганнар өчен социаль приюты һәм "Изгелек" инвалидларны тернәкләндерү үзәге. Агымдагы елда «Ал җилкән», «Исток», «Титан» яшьләр клубларында эшләр тәмамланып килә, «Нур» һәм «Шатлык» яшьләр үзәге биналарында ремонт эшләре бара. "Строитель" стадионын капиталь ремонтлау дәвам итә. Шуны да билгеләп үтәргә кирәк, объектларның күбесе бу елның август аенда файдалануга тапшырылачак.

"Шәһәр бүген бер зур төзелеш мәйданы. Ул әле юл төзелеше өлкәсендә 2 млрд сумнан артык эш алып барылуын әйтмәде. Август аенда без 1224 урынга исәпләнгән мәктәп, барлык алты балалар бакчасын да «Демография» илкүләм проекты буенча файдалануга тапшырырга тиеш. Илкүләм проектларны гамәли эшләр өлкәсенә күчерсәң, бу-Яр Чаллы шәһәрендәге балалар бакчалары. Бездә тугыз балалар бакчасы капиталь ремонтта, тагын алты яңа бакчага. Алар яңа, идәннәре җылытыла, территория төзекләндерелә. Без шуларның икесен тапшырдык, җидесе калды", - дип билгеләде шәһәр мэры Наил Мәһдиев.

Моннан тыш, Башкарма комитет җитәкчесе урынбасары Илмир Исхаков хәбәр иткәнчә, кайбер объектлар буенча профильле федераль һәм республика министрлыклары хупланган. Бу - "Республика клиник онкология диспансеры" филиалы бинасын төзү, 77нче һәм 30нчы мәктәпләр территориясендә йөзү бассейны ясау. Һәрберсе 300 урынга исәпләнгән ике ябык боз аренасы төзелеше Замелекесье торак районында һәм 52 нче комплекс каршында Җиңүнең 40 еллыгы урамында каралган.