Бүген 41 нче мәктәптә «Яр Чаллы шәһәре Ветераннар (пенсионерлар) берләшмәсе» җирле иҗтимагый оешмасының XI хисап-сайлау конференциясе узды. Чарада Чаллы шәһәре мэры Наил Мәһдиев, Татарстан Республикасы Ветераннар (пенсионерлар) региональ иҗтимагый оешмасы республика Советы рәисе Хәбир Иштирәков катнашты. Очрашуны Башкарма комитет җитәкчесе урынбасары Рамил Хәлимов алып барды.
Дәрәҗәле кунаклар арасында шулай ук «КАМАЗ-мастер» узыш командасы җитәкчесе Владимир Чагин да бар иде. Конференция башланыр алдыннан барлык катнашучыларга да яңа мәктәп буенча экскурсия уздырдылар.
Берләшмә рәисе Рәфыйк Имайкинның вәкаләтләрен вакытыннан алда туктату сәбәпле, шәһәр Ветераннар Советы (пенсионерлар) делегатларының очрашуы планнан тыш булды. Ул иҗтимагый оешманың соңгы 3,5 елдагы эшчәнлеге турында хисап доклады белән чыгыш ясады. Спикер үсеп килүче буынга патриотик тәрбия бирү темасына басым ясады.
«1нче Пост – шәһәрнең визит карточкасы. 44 ел дәвамында "мәңгелек ут" янында мактаулы каравыл хезмәт итә. Ел дәвамында 1 нче Пост аша 1000нән артык укучы уза. 20 бала Мәскәүгә сәфәр кылды, анда Александровский бакчасында Билгесез солдат кабере янында Хәтер вахтасында сафта торды. 15 укучы Беларусь Республикасына сәфәр белән бүләкләнде. Татарстан Республикасы президенты Рөстәм Миңнеханов, шәһәр мэры Наил Мәһдиевның үҗәтлеге, тырышлыгы белән "Җиңү" паркы янындагы мемориаль зонага реконструкция ясалды, Бөек Ватан сугышы чорындагы хәрби техника һәм Россия армиясе техникасы урнаштырылды. Паркта 11 Советлар Союзы Герое аллеясы ачылды», – дип билгеләп үтте Рафик Имайкин.
Рафик Имайкин залда утыручыларга уртак һәм нәтиҗәле эшләре өчен рәхмәт белдерде. Шуны да билгеләп үтәргә кирәк, җирле ветераннар иҗтимагый оешмасы Советы составына Автозавод, Үзәк, Комсомол районнарының, «КАМАЗ» ААҖ, «Камгэсэнергострой» иҗтимагый оешмалары керә. Совет каршында оештыру-методик эш һәм гражданнарның мөрәҗәгатьләрен карау, мәдәни-массакүләм һәм физкультура-сәламәтләндерү, патриотик тәрбия, ветераннарны социаль яклау, медицина хезмәте күрсәтү, хәрби хезмәттә һәлак булган ветераннар истәлеген мәңгеләштерү буенча комиссияләр төзелде.
Оешма вәкилләре урыннардагы эш нәтиҗәләре белән чыгыш ясадылар һәм Рафик Имайкин җитәкчелегендәге ветераннар Советы эшен уңай бәяләделәр.
Ветераннар Советы әгъзаларының очрашуы өч сәгатьтән артык дәвам итте. Очрашу ахырында шәһәр мэры Наил Мәһдиев конференциядә катнашучыларга шәһәрнең социаль-икътисадый күрсәткечләре турында сөйләде. Шәһәр башлыгы билгеләп үткәнчә, Яр Чаллыда мәктәпләр, балалар бакчалары төзелеше, социаль әһәмияткә ия объектларны һәм спорт корылмаларын ремонтлау буенча эш алып барыла.
«
Икътисад Камаз белән беррәттән эшли, күп кенә предприятиеләр үз күләмнәрен арттыралар. Юридик затлар һәм кече предприятиеләр саны арта. 3 ел элек без социаль-икътисадый яктан алга киткән территориягә әйләндек. Бу – 40 яңа предприятие эшчәнлегенә сәбәп булды. Автомобильләрдән тыш, шәһәр суыткычлар, башка төр продукция чыгара башлады. Без инвесторлар өчен шартлар тудырырга тырышабыз. Кытай Haier компаниясенең кер юу машиналары заводы 50 млн долларга төште. Бу кертемнәр 3,5 млрд сумнан артык. Моңа кадәр буш торган территориядә 12 завод төзеләчәк, анда биш мең кешегә эш булачак. 28 августта Әҗмәкәйдән чыгу юлында тагын ике завод салачакбыз. Соңгы 17 елда без иң түбән эшсезлек дәрәҗәсенә ия. Без 319 эре моношәһәрләрнең берсе булып торабыз. Сезнең эшчәнлекне дәвам итәбез. Һәр елны берәр мәктәп төзибез. Әлеге мәктәп проекты Россиядә иң яхшысы дип танылды. Аны үрнәк итеп алганнар һәм ул бөтен илгә таратыла. Биредә беренче сыйныфлар саны гына 13. Мондый хәл бездә, Кама буендагы шәһәрдә генә булырга мөмкин», - диде ул.
Конференциядә шәһәр Ветераннар Советының яңа рәисен сайладылар, шулай ук иҗтимагый берләшмәнең ревизия комиссиясе составын расладылар. Ветераннар (пенсионерлар) Советы әгъзалары итеп 24 кешене керткәннәр.
Советның актив вәкилләренә рәхмәт хатлары тапшырылды.
При использовании информации просьба ссылаться на Управление информационной политики и по связям с общественностью.
