Замелекесье бистәсендә ике яңа балалар бакчасы ачылды

Бүген тантаналы рәвештә Замелекесьеда берьюлы ике «Көлдергечләр» һәм «Капитошка» балалар бакчасы ачылды. Тантаналы вакыйга белән чаллылыларны ТР Премьер-министры ярдәмчесе Дәүфит Хәмәдишин, ТР Дәүләт Советы депутаты Светлана Захарова, Яр Чаллы шәһәре мэры Наил Мәһдиев котлады.

Башта микрорайонның 22 нче комплексында урнашкан 125 нче «Көлдергечләр» балалар бакчасын ачу тантанасы булды. Мәктәпкәчә учреждение 220 урынга исәпләнгән.  Аны генераль директор Раил Миңнегалиев җитәкчелегендә «Стройтрест» төзелеш компаниясе төзеде.

"Балалар-ул мәхәббәт, елмаю! Язырга, аралашырга, шигырьләр сөйләргә – бу балачак йортында өйрәтәләр. Илкүләм проектлар ярдәмендә шундый мәктәпкәчә учреждениеләр ачыла. Менә бу бакча 198 млн сумга төшкән. Бу акчаларны дәүләт балаларның яхшы, заманча бакчасы булсын өчен сарыф итә. Бу-дистәләрчә еллар дәвамында файдаланылачак объект. Мин барыгызны да бу вакыйга белән котлыйм. Сезнең тыныч күңел белән балаларыгызны тәрбиячеләр кулына тапшыруыгызны телим", – диде Наил Мәһдиев ачылу тантанасында.

"Социаль объектларны тапшыруның мондый масштабтагысын безнең шәһәр КАМАЗ төзелгәннән бирле хәтерләми. Бу бик зур эш. Теләсә кайсы балалар бакчасы ачылу – шәһәрлеләрнең тормыш сыйфатын яхшыртуга тагын бер адым. Әниләребез үз балаларын тәрбиячеләргә ышанып тапшырып, эшкә бара ала бит. Балаларның бакча тормышына тиз ияләшүен телисе килә", – дип ассызыклады Светлана Захарова.

"Көлдергечләр" балалар бакчасында-12 төркем булачак. Иркен физкультура һәм музыка заллары сабыйларны дәресләргә көтәләр.

Аннан соң хөрмәтле кунаклар Замелекесье микрорайонының 20нче комплексына юнәлделәр, аларны 124 нче «Капитошка» балалар бакчасында тәрбияләнүчеләр концерт программасы белән каршы алдылар. Мәктәпкәчә учреждение шулай ук 220 балага исәпләнгән.

Мәктәпкәчә учреждениене төзү белән ТР атказанган төзүчесе Мөнир Гайнуллов җитәкчелегендә «Домкор» төзелеш компаниясе шөгыльләнде.

Наил Мәһдиев җыелучыларга мәктәпкәчә учреждениеләр төзү планнары турында сөйләде. «Быел 1 сентябрьгә 1440 урынга исәпләнгән алты яңа балалар бакчасы ачылачак, шуларның 780е ясле яшьтәге балалар өчен. Бу ил, республика, шәһәр җитәкчелеге нәрсә белән шөгыльләнә дигән сорауга җавап. 2016 елда без алты балалар бакчасы ачтык, быел-алты. Киләсе елга-дүрт, 2021 елда тагын өчне ачу планлаштырыла», – дип уртаклашты шәһәр башлыгы.

"Капитошка" балалар бакчасында музыка залы, мөдир, өлкән тәрбияче, хуҗалык эшләре буенча мөдир урынбасары, логопед, педагог-психолог кабинетлары, шулай ук азык-төлек блогы, медицина блогы, спорт залы, кер юу бүлмәсе тулысынча җиһазландырылган.

Спорт залы өчен куркынычсыз катлам каралган һәм махсус «йомшак» линолеум урнаштырганнар. Спортзал янында сенсор бүлмә бар. Ул психоэмоциональ бушануга, балаларның психологик сәламәтлеген торгызуга һәм саклап калуга ярдәм итә.

"Капитошка" балалар бакчасы турындагы материалны тулырак монда  күрергә мөмкин.