Яр Чаллыда капиталь ремонттан соң 67 нче мәктәп ачылды

Капиталь ремонттан соң Яр Чаллыда мөмкинлекләре чикләнгән балалар өчен 67 нче мәктәп ачылды. 30 ел эчендә беренче тапкыр учреждениедә капиталь ремонт үткәрелде. Ачылыш тантанасында шәһәр мэры Наил Мәһдиев катнашты.

«Бу уку елы эчендә без мәгариф объектларын капиталь ремонтлауга һәм тагын бер яңа мәктәп төзүгә ирештек. Монда җитди финанс чаралары кертелде. Без мәгариф өлкәсенә зур игътибар бирәбез һәм нәтиҗәбез бар. Боларның барысы да үсеп килүче буын киләчәктә хезмәт базарында конкурентлыкка сәләтле булсын өчен эшләнә. Бүген күргәннәр – матур сүзләр түгел, ә реаль эшләр. Без шундый яхшы нәтиҗәләр белән горурланабыз һәм алга таба да яңа төзелгән һәм ремонтланган объектлар пәйда булсын өчен эшләячәкбез», – диде шәһәр мэры.

40 млн сумлык объектта эшләрне Чаллының «СтройТраст» төзелеш оешмасы башкарган. Ике катлы бинада интеллектуаль үсешләре тоткарланган 214 бала өчен барлык кирәкле шартлар да тудырылган.

Мәктәп директоры Нина Тузова шәһәр башлыгын яңартылган кабинетлар белән таныштырды. Ул учреждениедә 10 ел эшли. Мәктәп коллективында 50 кеше исәпләнә, шуларның 32се - педагоглар. Укытучыларның күбесе дистәләрчә еллар хезмәт куя.

Наил Мәһдиев мәктәпнең "көнкүреш музее" экспонатларын карады.

Билгеләп үтик, быел Яр Чаллыда ике мәктәп капиталь ремонтланды: 11 һәм 67белем бирү учреждениеләре, шулай ук 9 балалар бакчасы.(3, 15, 17, 33, 43, 54, 63, 73, 84). Бүген 11 нче мәктәп ачылды.