Чаллының 6нчы хастаханәсендә капиталь ремонттан соң бассейн ачылды

Бүген Яр Чаллы шәһәре мэры Наил Мәһдиев капиталь ремонттан соң 6 нчы хастаханәне карап чыкты. Билгеләп үтик, сәламәтлек саклау учреждениесендә ремонт эшләре ике ел дәвамында алып барылды.  Эшләрнең бәясе 212,6 млн сум тәшкил иткән. Яңартылган учреждение буенча экскурсияне шәһәр башлыгы өчен хастаханәнең баш табибы Нияз Мөҗәһитов уздырды. Мэр персонал белән аралашты, аларга ремонтның сыйфаты буенча сораулар бирде.

Бассейн инсульттан һәм җитди имгәнүләрдән соң пациентларны реабилитацияләү өчен билгеләнгән. 14 ел дәвамында ул файдаланылмаган. Бассейнны төзекләндерүне шәһәр Советы депутаты Марсель Мингалимов җитәкчелегендәге "Твой дом" компаниясе үткәрде. Бассейн касәсе-73 квадрат метр, тирәнлеге – 1,2-1,4 метр. Аның мәйданы бер үк вакытта 10нан 12 кешегә кадәр суда шөгыльләнергә мөмкинлек бирә. Физик мөмкинлекләре чикле кешеләр өчен бассейнга керү җайлаштырылган, периметр буенча култыклар урнаштырылган, җылы идәннәр җәелгән. Душ һәм бәдрәф бүлмәләре шулай ук уңайлы мохит таләпләренә туры килә. Начар күрүчеләр өчен күп санлы схемалар бар.

«Хәзер без көндезге стационар, физиотерапия, физик культура белән дәвалау шартларында пациентларны аякка бастыру элементлары кергән, амбулатор звенода реабилитациянең өченче этабын актив рәвештә гамәлгә кертәбез. Су белән дәвалау да әлеге компонентларның берсе булып тора. Бассейнда инсульт һәм травмалар кичергән пациентлар өчен гидротерапия булачак», – дип аңлатты 6нчы хастаханәнең баш табибы Нияз Мөҗәһитов.

Пациентлар белән дәресне дәвалау физкультурасы буенча инструктор үткәрәчәк. Бассейн касәсендә су дезинфекцияләгәндә зарарсыз концентрация чаралары һәм ультрашәмәхә нурлары белән суны ионизацияләү методы кулланыла. 

Учреждениене карагач, Наил Мәһдиев билгеләп үткәнчә, соңгы ике елда Яр Чаллыда сәламәтлек саклау учреждениеләрендә заманча шартлар булдыруга 2 млрд сум акча кертелгән. "2017 елда барлык шәһәр поликлиникалары өчен норматив халәткә китерү һәм заманча җиһазлар сатып алу өчен 1,5 млрд сум бүлеп бирелде. Без барлык 15 поликлиниканы да рекордлы кыска вакыт эчендә ремонтладык. 2018 елда 500 мең сум акча бүлеп бирелде. Яр Чаллы шәһәре, Татарстан Республикасы кебек үк, үсеш режимда яши. Урында тормыйбыз. Бүген кичәгегә караганда яхшырак. Иртәгә бүгенгегә караганда да яхшырак булачак!"- дип билгеләде мэр.

Шуны да билгеләп үтәргә кирәк, 2016 елда 6 нчы хастаханә – шәһәрдә бердәнбер һәм Татарстан буенча дүрт хастаханәнең берсе булып «Дуслык сырхауханәсе-Татарстан стандарты» пилот проектын гамәлгә ашырды һәм башка учреждениеләр өчен компетенция үзәгенә әверелде.