Чаллылыларга салым түләү сроклары турында искәртәләр

 Башкарма комитет, Чаллы шәһәре буенча Федераль салым хезмәте инспекциясе белән берлектә, 2018 ел өчен барлык милек салымнарын түләү кирәклеген искәртү өчен, шәһәрнең әйдәп баручы предприятиеләре һәм оешмалары җитәкчеләре белән киңәшмә үткәрде. Салым законнары белән билгеләнгән срокта торак йорт, фатир, җир кишәрлекләре, транспорт чаралары милекчеләре бюджет алдында үз бурычларын үтәргә тиеш. "Сезгә салым түләүне соңгы көнгә кичектермәү үтенече белән мөрәҗәгать итәсем килә. Җир салымы, физик затлар милкенә салым муниципаль бюджетның керем өлешен формалаштыралар һәм чыгым йөкләмәләрен үтәүне гарантиялиләр", - диде Башкарма комитет җитәкчесе урынбасары, Финанс идарәсе башлыгы Ирина Сәгыйдуллина.

 Исегезгә төшерәбез, чаллылыларга 2018 ел өчен физик затларның милек салымнарын 2019 елның 2 декабренә кадәр түләргә кирәк. Халыкка уңайлы булсын өчен 25нән 29 ноябрьгә кадәр салым инспекциясендә операция залының эш вакыты 19:00 сәгатькә кадәр озайтылды.

Федераль салым хезмәтенең Чаллы шәһәре буенча идарәсе башлыгы урынбасары Нәзирә Шәрифуллина 2019 елда милек салымнарын түләү үзенчәлекләре турында сөйләде һәм чаллылыларның сорауларына җавап бирде. Салымнарны халык берничә төрле ысул белән түли ала. Моны Россия Федераль салым хезмәте сайтында «Физик затлар өчен шәхси кабинет» та, «Физикзатлар өчен салым» мобиль кушымтасы, дәүләт хезмәтләренең бердәм порталы аша, түләү терминаллары, банк яки почта бүлекләре, шулай ук Россия Федераль салым хезмәте сайтында «Салымнар һәм пошлиналар түләү» сервисы ярдәмендә эшләргә мөмкин.