Яр Чаллыда студентлар Лигасы төзелде

Яр Чаллыда урта махсус уку йортлары һәм югары уку йортлары студентлары съезды узды. Чарада ТР Яшьләр эшләре һәм спорт министры Дамир Фәттахов, студентлар лигасы президенты Руфат Кыямов, Башкарма комитетның Мәгариф һәм яшьләр эшләре буенча идарәсе башлыгы Рөстәм Хуҗин катнашты.

Дамир Фәттахов җыелучыларны сәламләде һәм автокалада беренче съезд уздырылу белән котлады. Ул шулай ук яшь министрлыкның нинди проектларны тормышка ашыруы турында сөйләде, физик затлар өчен грантлар конкурсы (14-30 яшь) башлануын, анда һәр яшь кеше үз проектын тормышка ашыру өчен 300 мең сумга кадәр акча отарга мөмкин булуын билгеләп үтте. 

Очрашу барышында Шәһәр студентлар Советы һәм Татарстан студентлар Лигасы арасында хезмәттәшлек турында килешүгә кул куелды һәм «Яр Чаллы Студентлар лигасы» төзелде, аның рәисе итеп КФУның Яр Чаллы институты студенты Евгений Попов билгеләнде.

Шуны билгеләп үтәргә кирәк, автокала студентлары белән эш Шәһәр студентлар Советы, студентлар Лигасы, «Нур» яшьләр үзәге һәм студентлар үзидарәсен үстерү белән кызыксынучы барлык кешеләр белән берлектә алып барылачак.

Исегезгә төшерәбез, Татарстан Республикасында студентлар үзидарәсе органнарын үстерү максатларында студентлар яшьләрен берләштерү программасы кысаларында Татарстан Республикасы Студентлар лигасы тарафыннан мондый съездлар Алабуга, Әлмәт, Түбән Кама, Яшел Үзән һәм Бөгелмә шәһәрләрендә оештырылды.