Яр Чаллыда эшсезлек дәрәҗәсе Татарстанның башка моношәһәрләренә караганда түбәнрәк

Яр Чаллыда эшсезлек дәрәҗәсе 0,43% тәшкил итә. Бу хакта бүген «эшлекле дүшәмбе»дә шәһәрнең мәшгульлек үзәге директоры Татьяна Быданова хәбәр итте. Ул билгеләп үткәнчә, республиканың башка моношәһәрләрендә бу күрсәткеч югарырак: Алабугада – 1,09%, Яшел Үзәндә – 0,79%, Түбән Камада – 0,75%, Чистайда – 0,54%.

«Россия Федерациясе, Татарстан Республикасы һәм Идел буе округының якын-тирә субъектларында тулаем алганда хәл түбәндәгечә: Россия Федерациясе буенча теркәлгән эшсезлек дәрәҗәсе – 0,9%, Татарстан Республикасында – 0,5%, Башкортстанда – 0,9%, Мордовиядә – 0,8%, Удмуртиядә - 0,8%, Чувашиядә – 0,7%, Марий Элда-0,6%», - дип сөйләде Татьяна Быданова. Наил Мәһдиев билгеләп үткәнчә, эшсезлек дәрәҗәсе күрсәткечләре – шәһәр, республика һәм федераль хакимиятләр эше нәтиҗәләре. 

«Безнең сәясәт Татарстан Республикасы җитәкчелеге, шәхсән президент Рөстәм Нургали улы Миңнеханов ярдәме белән, шәһәрнең инвестицион җәлеп итүчәнлеге ягыннан, өстәмә яңа производстволар, шул исәптән алгарышлы социаль-икътисадый үсеш территориясе резидентлары ярдәмендә эшсезлек дәрәҗәсенә туры килә. Ул түбәнрәк булган саен, кешеләрнең эш һәм хезмәт хакы алу мөмкинлеге дә зуррак», - диде шәһәр мэры.

Хәзерге вакытта эшсезләр сыйфатында 1224 Чаллы кешесе исәптә тора. Халыкны эш белән тәэмин итү үзәгенең мәгълүматлар базасында эшче белгечлекләр өчен вакансияләр – 58%. Квалификацияле эшчеләр – слесарьлар, шоферлар, электромонтерлар, электр-газ белән эретеп ябыштыручылар-иң зур ихтыяҗ тудыра. Белгечләр һәм хезмәткәрләр арасында төрле белгечлек табибларына, инженерларга, шәфкать туташларына һәм башкаларга ихтыяҗ арта; квалификациясез кадрлар арасыннан алганда, җыештыручылар, ишегалды җыештыручылары, ярдәмче эшчеләр, төрүчеләр кирәк. Эш бирүчеләр тәкъдим иткән хезмәт хакы күләме 12 мең сумнан башлана һәм 100 мең сумга җитә. Иң күп түләүле вакансияләр-сатулар буенча менеджер, табиб-педиатр, металлоконструкцияләр җыю буенча слесарь вазифалары.