Яр Чаллыда "Россия эше" кадрлар үзәген тәкъдим иттеләр

Яр Чаллыда «Россия эше» дигән кадрлар үзәген тәкдим иттеләр. Модернизациядән соң халыкны эш белән тәэмин итү үзәге шундый исем алды. Ул «Хезмәт җитештерүчәнлеге үсешен тәэмин итү өчен мәшгульлек һәм хезмәт базарының нәтиҗәлелеген арттыру» федераль проекты һәм «Хезмәт җитештерүчәнлеге һәм эш белән тәэмин итүгә ярдәм итү» илкүләм проекты кысаларында тормышка ашырылган. Элеккеге мәшгульлек үзәгенең яңарышын бәяләргә Хезмәт һәм мәшгульлек буенча Федераль хезмәт җитәкчесе урынбасары Денис Васильев килде. Кунакларны Татарстан Республикасы Хезмәт, мәшгульлек һәм социаль яклау министры Эльмира Зарипова, Яр Чаллы шәһәре мэры Наил Мәһдиев, Татарстан Республикасы Дәүләт Советы депутаты Юрий Камалтынов каршы алды.

Яңартылган мәшгульлек үзәге халыкка тормыш хәлләреннән чыгып хезмәт күрсәтәчәк. Әйтик, аларның берсе – «аз керемле гаиләләрдәге, балигъ булмаган балалары булган хатын-кызларның, шулай ук пенсия яшендәге һәм пенсия яшенә җитмәгән гражданнарның мәшгульлегенә булышлык итү». Бу – эш эзләү, һөнәри юнәлеш бирү, социаль адаптация, һөнәри белем бирү, үзмәшгульлеккә ярдәм итү һәм башка мәсьәләләрдә гражданнарга комплекслы ярдәм күрсәтү системасы.

Шулай ук юридик ярдәм, дәүләт социаль ярдәмен күрсәтү мөмкинлеге, шул исәптән социаль контракт нигезендә, резюме төзү һәм аны «Россия эше» порталында урнаштыру хезмәтләре бар.

Икенче очрак - "I, II, III группа инвалидларның мәшгульлегенә булышлык итү". Инвалидлыгы булган гражданнар өчен халыкны эш белән тәэмин итү дәүләт хезмәтеннән тыш, бер тәрәзә системасы буенча Яр Чаллы шәһәренең «Изгелек» инвалидларны тернәкләндерү үзәгендә Психологик ярдәм күрсәтү хезмәтләре тәкъдим ителәчәк.

"Проект интерьерның бизәлешен үзгәртүгә генә кайтып калмый, барыннан да элек бу – эшнең сыйфатын үзгәртү. Яр Чаллыда эш белән тәэмин итү үзәге - республикада гына түгел, илдә дә иң зурларның берсе. Шәһәр алгарышлы үсеш территориясе резиденты статусына ия, биредә яңа производстволар ачыла", - дип билгеләп үтте Эльмира Зарипова.

Шулай ук кадрлар үзәгендә эш бирүчеләрнең ике бизнес-ситуациясе дә сынау уза. Шуларның берсе - "Инвестиция проекты". Эш белән тәэмин итү хезмәте эш бирүчеләргә кирәкле хезмәткәрләрне сайлап алуда, вакантлы эш урыннары ярминкәләрен оештыруда, алдан һөнәри белем алуда ярдәм итәргә тәкъдим итә. Шул ук вакытта эш бирүчегә хезмәткәрләрне беренчел сайлап алу, персоналны бәяләү һәм хокукый мәсьәләләр буенча консультация үткәрергә ярдәм итәчәкләр.

Икенче бизнес-ситуация - "Кече предприятие төзү". Мәшгульлек хезмәте гамәлдәге дәүләт хезмәтләре белән беррәттән (үз эшен ачучы гражданны теркәү, шәхси эшмәкәр яки юридик затны теркәүгә киткән чыгымнарны компенсацияләү) Күпфункцияле үзәккә документлар әзерләү һәм кадрлар эшен оештыру кебек яңа хезмәтләр тәкъдим итәчәк.

Үзәктә шулай ук балалар белән килүчеләр өчен дә уңайлыклар тудырылган.

Учреждениене караганнан соң үзәк хезмәткәрләре белән матбугат конференциясе узды.

Хезмәт һәм мәшгульлек буенча Федераль хезмәт җитәкчесе урынбасары Денис Васильев мәшгульлек үзәгенең үзгәрүенә югары бәя бирде: "Сез – беренче, шуңа күрә безнең алда зур җаваплылык тора иде. Калган үсеш сезнең модель буенча булачак. Хәзер без иң яхшы үрнәкне, иң яхшы практиканы формалаштырабыз, аны республика һәм ил күләмендә трансляцияләргә мөмкин булачак. Безнең проектта тормышка ашырыла торган иң төп идея – кадрлар белән эшләү. Без кешеләр белән күбрәк шөгыльләнергә, аларны инвестицияләргә, алар турында кайгыртырга тиеш. Без эш бирүчеләрнең кадрларга булган ихтыяҗларын нәтиҗәле канәгатьләндерүгә ярдәм итәргә тиеш", – дип ассызыклады ул.

Наил Мәһдиев федераль хакимиятләргә автокалада илкүләм проектны гамәлгә ашырган өчен рәхмәт белдерде: «Эш финанс ресурсларында гына түгел, әлбәттә, бу да бик мөһим. Россия Федерациясе Хезмәт һәм социаль яклау министрлыгы һәм Россия Федерациясе Хөкүмәте җитәкчелеге шәһәребезгә аерым игътибар бирә. Күптән түгел генә Илбашы Владимир Владимирович Путинның визиты булды. Мондый игътибар очраклы түгел. Яр Чаллы – илдәге иң эре моношәһәр, социаль-икътисадый үсештән алданрак булган иң зур территория. Шәһәр заманча технологияләргә генә мохтаҗ түгел. Технологияләрне уйлап табарга, сатып алырга, алып килергә, кертергә була. Иң мөһиме - бу технологияләрне кулланачак кешеләр, шуңа күрә кадрлар мәсьәләсе бүген безнең шәһәрдә һәм республикада, илдә – беренче урында. Әлеге үзәк шәһәрдә кадрлар формалаштыру планында мөһим үзәк булыр дип уйлыйм», – диде шәһәр башлыгы.

Шуны билгеләп үтәргә кирәк, Яр Чаллы - Россия Федерациясенең уналты пилот субъектының берсе, анда 2019 елдан "Хезмәт җитештерүчәнлеге һәм эш белән тәэмин итүгә ярдәм "илкүләм проектын гамәлгә ашыру башланды.