Яр Чаллыда Бөек Ватан сугышы ветераны 95 яшьлек юбилее уңаеннан котлаулар кабул итә

Комсомол районында Бөек Ватан сугышы ветераны Тәгъзимә Сәгыйз кызы Шәрипова 95 яшьлек юбилеен билгеләп үтә. РФ президенты Владимир Путин, Чаллы шәһәре мэры Наил Мәһдиев, ТР Дәүләт Советы депутаты Марсель Мингалимов исеменнән котлаулар һәм бүләкләрне юбилярга Комсомол районы администрациясе башлыгы урынбасары Татьяна Скибина тапшырды.

Тәгъзимә Сәгыйз кызы ТАССРның Зәй районы Имәнлебаш авылында туа. Башлангыч мәктәпнең дүрт сыйныфын тәмамлый. Сугыш елларында туган авылында кыр эшләрендә, урман кисүдә катнаша. 1947 елда Бөек Ватан сугышы ветеранына кияүгә чыга. 1960 елда гаилә Яр Чаллыга күчеп килә. Лаеклы ялга чыкканчы Тәгъзимә Сәгыйз кызы кою заводында эшли. 

Ветеран «1941-1945 еллардагы Бөек Ватан сугышында фидакарь хезмәт өчен» медале, юбилей медальләре белән бүләкләнгән.