Яр Чаллыда сугыш ветераннары өчен госпиталь резерв госпитале булырга мөмкин

Чаллының сугыш ветераннары өчен госпитале коронавирус белән авыручылар өчен резерв стационарга әйләнергә мөмкин. Госпитальнең коронавирус инфекциясе белән авыручыларга медицина ярдәме күрсәтүгә әзерлеген Татарстан Республикасы буенча баш федераль инспектор Виктор Демидов һәм Сәламәтлек саклау өлкәсендә күзәтчелек федераль хезмәтенең ТР буенча идарәсе җитәкчесе Любовь Шәйхетдинова бәяләделәр. Учреждениедә коронавирус инфекциясе расланган пациентлар өчен 80 койкага исәпләнгән резервны ачу күздә тотыла.

Яр Чаллының сәламәтлек саклау идарәсе башлыгы Александр Николаев һәм госпитальнең баш табибы Резеда Мавзютова кислород ярдәме системалары белән җиһазландырылган палаталарны күрсәттеләр һәм пациентларның маршрутлаштыруын оештыру турында сөйләделәр. Шуны да билгеләп үтәргә кирәк, әлеге учреждение хезмәткәрләре COVID-19 диагнозы белән авыручыларга ярдәм күрсәтү буенча укулар узды.

Кирәк булган очракта, коронавирус белән авыручылар өчен госпитальләр йогышлы авырулар хастаханәсендә, 2нче шәһәр хастаханәсендә җәелдереләчәк. Шуны билгеләп үтәргә кирәк, элек Яр Чаллы шәһәре мэры Наил Мәһдиев "Жемчужина" шифаханәсе территориясен мөмкин булган обсерватор буларак карады.