Яр Чаллы шәһәре мэры Наил Мәһдиев йогышлы авырулар хастаханәсен капиталь ремонтлау барышы белән танышты. Социаль объектта ремонт эшләрен Илнар Гайсин җитәкчелегендә «Евростиль» төзелеш оешмасы алып бара. Хәзерге вакытта бинаның түбәсен ябу буенча эшләр 100%ка башкарылган, ишекләр һәм тәрәзәләр алыштырылган. B1 блогының соңгы-өченче катын ремонтлау тәмамланып килә. Төзүчеләр бизәкләү эшләрен бу атна ахырында төгәлләячәкләр. Сантехника һәм электромонтаж эшләре, шулай ук фасадны ремонтлау ай ахырында тәмамланачак.
Учреждениенең баш табибы Ришат Ногманов сөйләвенчә, беренче катта поликлиниканы ачу планлаштырыла, калган ике катны балалар һәм өлкәннәр өчен пульмонология бүлеге алып торачак. Шунысын билгеләп үтәргә кирәк, бүлек сулыш системасы органнары авыруларын дәвалау өчен билгеләнгән.
Ел саен учреждениенең кабул итү бүлегенә 26 меңнән артык кеше мөрәҗәгать итә.
Шәһәр башлыгы карау барышында шулай ук ремонт эшләре башкаручы хезмәткәрләр белән дә аралашты. Объектта барлыгы 150ләп кеше эшли. Барлык кирәкле куркынычсызлык нормалары үтәлгән.
B1 блогында 42 койкага исәпләнгән тулы кыйммәтле стационар бүлек каралган. Медицина кислородына торбаүткәргечләр һәр палатага озатылды. «Эпидсезон вакытында койка егәрлеген 56га кадәр арттыру мөмкинлеге бар. Алар барысы да кислород һәм вакуум белән җиһазландырылачак, пульмонологиянең һәр бүлегендә турыдан-туры ингаляция өчен күчерелә торган һәм стационар физиоаппаратлар булачак», - дип билгеләп үтте Ришат Ногманов.
«Хәзер әзерлек югары. 10-14 көннән төзүчеләр биредә барлык эшләрне дә төгәлләячәк. Җиһазлар һәм мебель белән тәэмин итәсе калачак. Блокны ремонтлауга оператив рәвештә күчәргә кирәк. Без ТР Хөкүмәте белән эшлибез, Рөстәм Миңнехановтан ярдәм алабыз. Шулай ук килеп туган хәлне исәпкә алып, без йогышлы авырулар хастаханәсендә эшне дәвам итәчәкбез. Бу – шәһәр һәм республиканың иң эре клиникаларының берсе һәм ярты миллионлы Яр Чаллы шәһәренә генә түгел, Татарстанның тагын 17 районына да хезмәт күрсәтә. Якын арада без А һәм Б блокындагы эшләргә дә алынырбыз дип уйлыйм. Исегезгә төшерәбез, өч ел элек без бер үк вакытта 15 поликлиниканы ремонтлый алдык», – дип билгеләде Наил Мәһдиев.
Б блогын ремонтлауга төзүчеләр бу елның җәендә керешер дип планлаштырыла. Йогышлы авырулар хастаханәсендә капиталь ремонт 2018 елның маенда башланды һәм этаплап бара. 2019 елда яңартылган B2 блогы медицина җиһазлары белән җиһазландырылган, анда реанимация, диагностика бүлекләре һәм респиратор-вирус инфекцияләренең балалар бүлеге урнашкан. Хастаханәнең гомуми мәйданы 30 мең кв. метр тәшкил итә.
При использовании информации просьба ссылаться на Управление информационной политики и по связям с общественностью.
Дүшәмбе, 13 апрель 2020, 17:16