Бүген Наил Мәһдиев шәһәрнең бизнес-җәмәгатьчелеге вәкилләре белән киңәшмә үткәрде. Очрашу видеоконференция режимында оештырылды, анда 40 эшмәкәр, шул исәптән Башкарма комитет җитәкчесе урынбасарлары Наталия Кропотова һәм Ирина Сәгыйдуллина, банк структуралары җитәкчеләре, кече һәм урта бизнес вәкилләре катнашты. Киңәшмә ике сәгать дәвам итте. Бу вакыт эчендә эшмәкәрләр үзләрен борчыган сорауларны бирә һәм җаваплар ишетә алдылар.
Шулай итеп, Татарстан Республикасы машина төзелеше кластеры идарәсе рәисе Сергей Майоров машина төзелеше тармагының проблемалы мәсьәләләре турында сөйләде. «Без икътисадның зыян күргән тармаклары исемлегенә кермәдек. Шуңа күрә машина төзүчеләр хезмәткәрләргә хезмәт хакын түләү өчен 12 130 сумга дәгъва кыла алмый. РФ Икътисадый үсеш министрлыгы сайтында үз компанияңнең исемен кертеп, анда нинди ярдәм чараларына дәгъва итәргә мөмкин булуын карап була», – дип билгеләп үтте ул.
Наил Мәһдиев җавап итеп, РФ Дәүләт Думасы һәм ТР Дәүләт Советы депутатларына мөрәҗәгать белән чыгарга тәкъдим итте: "Әйдәгез, бу мәсьәлә белән республика җитәкчелегенә мөрәҗәгать итик. Бездә Сергей Анатольевич Когогин, РФ Дәүләт Думасы депутатлары бар. Аларның тавышлары шактый зур. Безнең территориядән килгән Дәүләт Советы депутатлары да бу яктан ярдәм итә алалар", - диде мэр.
Шәхси медицина клиникалары хуҗалары исеменнән клиниканың баш табибы чыгыш ясады . Аның сүзләренә караганда, бүген медицина өлкәсендә бизнес үз хезмәткәрләренә хезмәт хакын түләүгә процентсыз кредит ала алмый. «Минем ОКВЭД юк диделәр. Әйтик, стоматологларның ОКВЭДы бар, тик тулысынча медицина эшчәнлеге юк. Хезмәт хакыннан башка хезмәткәрләрне тоту зур проблема. Мин үз кул астымда булган 115 кешене саклап калырга телим», - дип уртаклашты эшмәкәр.
Ишегалларын төзекләндерү программасында катнашу тәкъдиме белән «Кама плиткасы» предприятиесе директоры Марат Хафизов мөрәҗәгать итте: «Без тәэмин итүчеләр булуыбызга яки проектларны эшләүдә катнашуыбызга шат булыр идек, үз продуктларыбыз һәм белемнәребез белән уртаклашырга телибез». Шәһәр башлыгы плитка сыйфатын югары бәяләде һәм Башкарма комитет җитәкчесенә эшмәкәрнең ремонт эшләрендә катнашуын карарга кушты. Бизнес-бергәлекне шулай ук ресурс белән тәэмин итүче оешмаларга, килеп туган ситуациядә, аренда түләүләрен һәм аванс түләүләрен башкару мәсьәләләре кызыксындырды.
"Алексей Песошинның энергия белән тәэмин итүче оешмаларның директорлар Советы Рәисе булуын исәпкә алып, Татарстан Республикасы Хөкүмәте Рәисенә мөрәҗәгать итәргә әзер. Без әлеге компанияләр җитәкчелеге бу шартларда агымдагы түләүләрне бөтен кеше дә түли алмавына аңлап карарлар дип өметләнәбез", - дип җавап бирде Наил Мәһдиев.
Онлайн-очрашу барышында кергән борчулы сораулар арасында микробизнес эшчәнлеген яңарту шартлары да бар иде: аяк киеме һәм ачкычларны ремонтлау остаханәсе. Мэр куркынычсызлык чаралары үтәлсә, эшмәкәрләр эшли ала, дип билгеләп үтте. Әмма киемне ваклап сату әлегә мөмкин түгел - Наил Мәһдиев онлайн-сату һәм илтеп бирүне эшкә җигәргә тәкъдим итте.
Шуны да билгеләп үтәргә кирәк, Наил Мәһдиев катнашында мондый киңәшмәләр Яр Чаллыда атнага ике тапкыр уза.
"Хәтта муниципалитет кысаларында да без билгеле бер карарлар таба, республика һәм федераль дәрәҗәләрдә үз позицияләребезне яклый алабыз. Бүгенге сөйләшүне исәпкә алып, эш беркетмәсе булдырылачак. Сезнең һәрберегез белән очрашудан соң без аларны пунктлар буенча эшкәртәбез. Барыгызга да уртак эш өчен рәхмәт. Барыгызга да түземлек! Барыбызның да бу кризисны кичерербез дигән ышанычы булырга тиеш. Иң мөһиме, сез һәм сезнең эшли белүче һәм эшләргә теләгән командаларыгыз бар – бу бик зур ресурс", - дип тәмамлады очрашуны Наил Мәһдиев.
При использовании информации просьба ссылаться на Управление информационной политики и по связям с общественностью.
Җомга, 17 апрель 2020, 18:41