Бүген Яр Чаллы шәһәре мэры Наил Мәһдиев капиталь ремонт бара торган мәгариф учреждениеләренә тикшерү сәфәре кылды. Башта мэр Мулланур Вахитов исемендәге 2 нче гимназиядә эш барышы белән танышты. Бүген ул икенче тууын кичерә. Объектта эшләрне Феликс Бәхтигәрәев җитәкчелегендәге Чаллының «Медик» компаниясе башкара. Җиһазлар сатып алу өчен республика бюджетыннан 176 млн сум бүлеп бирелгән. Төзүчеләр эшләрне 20 августка тәмамларга планлаштыралар. 1 сентябрьдә мәктәпкә 90 беренче сыйныф укучысы киләчәк. Мәктәптә барлыгы 838 бала белем ала.
"Татар гимназиясе горурланырлык объект булуын телибез. 100 еллык тарихы булган гимназия бу. Биредә яхшы укытучылар, алар яхшы белем бирә. Милли мәгариф мәсьәләләре бик мөһим. Һәр халык үз туган телендә белем алырга хокуклы. Без быел да Автономияле Татар Социалистик Совет Республикасы төзелүгә 100 ел тулуны билгеләп үтәбез. Объект Рөстәм Нургалиевич Миңнеханов ярдәме белән финанслана. Ул, катлаулы финанс вәзгыятькә карамастан, ремонт буенча безнең инициативаны хуплады", - диде Наил Мәһдиев, төзелеш эшләренең сыйфатын югары бәяләде.
При использовании информации просьба ссылаться на Управление информационной политики и по связям с общественностью.
Сишәмбе, 30 июнь 2020, 17:40