Яр Чаллыда эшләнгән: ТОСЭР резидентлары нинди көнкүреш техникасы җитештерә

 Алгарышлы социаль икътисадый үсеш территориясе резидентлары эшчәнлеге турында Башкарма комитет җитәкчесе урынбасары Эльдар Тимергалиев сөйләде. Иң эре резидентларның берсе – Haier компаниясе. Бүген шәһәр территориясендә суыткычлар, кер юу машиналары һәм телевизорлар җитештерә торган дөнья компаниясенең өч заводы эшли. "Бүгенге көндә Haier компанияләре төркеменең көнкүреш техникасын чыгару буенча гомуми күләме миллион берәмлектән артып китте. Әлбәттә, суыткычлар җитештерү зур өлешне алып тора – бу 850 мең данә", - диде Илдар Тимергалиев. Моннан тыш, 120 мең кер юу машинасы һәм 126 мең телевизор чыгарылган.

Кече көнкүреш техникасын Яр Чаллы ТОСЭРның тагын бер резиденты – Polaris компаниясе җитештерә. Бу ел эчендә 12 мең ит тарткычы һәм 7 меңнән артык микродулкынлы мич чыгарылган: "Безнең өчен бу бик мөһим. Стратегия буенча, без гамәлдәге резидентларны үстерүгә игътибар бирергә генә түгел, ә әлеге җитештерүчеләр тирәсендәге яңа производстволарны үстерүгә дә ярдәм итәргә тиеш. Мин комплектлау әйберләре чыгаруны күздә тотам. Без Haierда таләпләр югары дәрәҗәдә булуын аңлыйбыз. Безнең өчен бу бик яхшы, чөнки яңа бизнес-проектлар барлыкка килә. Бүген һәркем теге яки бу комплектлау детальләренең гамәлдәге заводларга ихтыяҗын карый, бизнес-планны исәпләп чыгара һәм шәһәрнең икътисадый тормышында катнаша ала", - дип билгеләп үтте спикер.
 Яр Чаллыда ТОСЭР резидентлары тарафыннан 15,9 млрд сум инвестиция кертелгән. 5 800 яңа эш урыны булдырылган. Бюджетның барлык дәрәҗәләренә якынча 4 млрд сум салым күчерелгән. Барлык дәрәҗәдәге бюджет һәм бюджеттан тыш фондлар хисабына – 2 млрд сум преференция алынды. Җирле бюджетка физик затлар кеременә салым буенча 160 млн сум кергән.