Наил Мәһдиев сайлау комиссиясенә Шәһәр Советына сайлауларда катнашу өчен "Бердәм Россия" партиясе исемлегеннән кандидатларның документларын тапшырды

Яр Чаллыда "Бердәм Россия" партиясенең Яр Чаллы җирле бүлегеннән кандидатлар исемлеген тәкъдим итү өчен документлар тапшырылды. Территориаль сайлау комиссиясендә кандидатларның беренче «өчлеге» - шәһәр мэры Наил Мәһдиев, Ашыгыч ярдәм медицинасы хастаханәсе баш табибы Марат Мөхәммәдиев һәм «Тормоз механизмнары заводы» НПО коммерция директоры Татьяна Белькова катнашты.

Шәһәр мэры барлык кандидатларның документларын берьюлы тапшырды - исегезгә төшерәбез, алар 27. Барлык кирәкле документлар кабул ителде. Сайлау кампаниясен үткәрү өчен финанс счетын ачу рөхсәт ителә.

"Бердәм Россия" партиясеннән алдан тавыш бирүгә 70 кандидат гариза бирде. Конференция карары белән, алдан тавыш бирү процедурасында иң күп тавыш җыйган 27 кеше, 13 сентябрьдә узачак сайлауларда катнашу өчен, "Бердәм Россия" партиясенең Чаллы бүлекчәсе тарафыннан тәкъдим ителде.

"Бүген "Бердәм Россия" партиясе тарафыннан тәкъдим ителгән 27 кеше – шәһәрнең танылган кешеләре. Яр Чаллы тормыш эшчәнлегенең барлык өлкәләрендә эшләүче кешеләр. Бу сәнәгать тә, төзелеш тә, социаль-мәдәни өлкә дә, энергетика, башка тармаклар вәкилләре дә. Аларның уңышка ирешүнең үз тарихлары бар. Кешеләр шактый яшь, яңа йөзләр бар", - диде шәһәр мэры Наил Мәһдиев. - "Без эшли белүче, шәһәр җәмәгатьчелегенә файда китерә торган яшь сәясәтчеләрне күрәчәкбез".