Яр Чаллыда традицион җәйге ишегалды бәйрәмнәре старт алды. "Ишегалды
көнен беренче тапкыр 71нче комплекста "Эврика" мәдәни үзәгенең спорт
мәйданчыгында да оештырдылар. Аны шәһәр мэры Наил Мәһдиев та карады.
Башта Наил Мәһдиев, Автозавод районы администрациясе башлыгы Винер
Харисов, «Сосновый бор» территориясе Советы Рәисе Наил Насыйбуллин белән
бергә, территорияне карап чыкты һәм әлеге микрорайонда яшәүчеләрне
борчыган мәсьәләләр буенча фикер алышты. Шәһәр башлыгы
фельдшер-акушерлык пунктын төзү кирәклеген билгеләде: «Шәхси секторда
яшәүчеләр өчен кичектергесез медицина ярдәме кирәк», - дип ассызыклады
ул, катнашучылар алдында чыгыш ясаганда.
Исегезгә төшерәбез, быел Яр Чаллыда модульле фельдшер-акушерлык пункты
Сидоровка бистәсендә урнаштырылган инде.
Наил Мәһдиев шулай ук микрорайонда яшәүчеләр белән аралашты һәм шәһәрне төзекләндерү кысаларында нинди эшләр алып барылуы һәм алда торган бурычлар турында сөйләде. "Бу микрорайон үсешенә шактый җитди финанс ресурслары керттек. Залесный проспектын быел ремонтлаганнар. Соңгы биш елда дүрт мәктәп, егерме яңа балалар бакчасы төзелде. Быел бездә берьюлы өч яңа спорт объекты барлыкка килде: "Юбилейный" бассейнын ачтылар, 52 нче комплекста яңа боз аренасын һәм Гренада паркындагы футбол манежын ачарга әзерләнәләр. Сентябрьдә татар драма театрын ачабыз, рус драма театры бинасын төзи башлыйбыз", - диде Наил Мәһдиев.
Комплекс халкы өчен бу кичтә иҗат коллективлары һәм «Эврика» мәдәни
үзәге солистлары катнашында бәйрәм программасы оештырылды, шулай ук
микрорайонда яшәүчеләрнең концерт номерлары күрсәтелде. Артистлар
арасында Татарстанның атказанган артисты Гөлдания Хәйруллина да бар иде.
Чарада «КАМАЗ Энерго» генераль директоры Владислав Гаврилов катнашты.
Бәйрәм кунаклары иҗади мастер-классларда һәм спорт бәйгеләрендә катнаштылар.
При использовании информации просьба ссылаться на Управление информационной политики и по связям с общественностью.
Җомга, 7 август 2020, 10:16