Наил Мәһдиев Чаллы гаиләләренә ана капиталы сертификатлары тапшырды

Бүген Тантаналар сараенда ана капиталы сертификатлары тапшырылды. Тантаналы чарада Чаллы шәһәре мэры Наил Мәһдиев катнашты. Ул чаллылыларны истәлекле вакыйга белән котлады һәм 20 гаиләгә ана капиталы сертификаты тапшырды. "Баланың дөньяга килүе иң зур бәхет. Мин сезне гаилә тормышында бу мөһим вакыйга белән котлыйм", – диде Наил Мәһдиев.

2020 елда ана (гаилә) капиталы күләме беренче бала туганда (уллыкка алганда) 466 617 сум, икенче, өченче һәм аннан соңгы балалар туганда 616 617 сум тәшкил итә. "Владимир Путин игълан иткән программа эшли. 2007 елдан башлап чаллылылар 46 меңнән артык сертификат алды. Алынган акчалар суммасы 21,5 млрд сум тәшкил итә. 2020 елның 1 гыйнварыннан ана капиталын беренче балага да алу мөмкинлеге бар", - дип билгеләде мэр.

Шуны да билгеләп үтәргә кирәк, программа Яр Чаллыда 2007 елдан бирле тормышка ашырыла. Бу вакыт эчендә 46 меңнән артык сертификат бирелгән. Күпчелек гаиләләр – 35,5 меңнән артык, ана капиталы акчаларын торак шартларын яхшыртуга юнәлдерделәр.

Сертификатлар тапшырудан тулы фоторепортажны "Яр Чаллы шәһәре администрациясе"нең Вконтакте рәсми төркемендә карагыз.