Яңа чакырылыш Шәһәр Советының даими комиссиясе үзенең беренче утырышын үткәрде

Бүген Яр Чаллыда IV чакырылыш Шәһәр Советының даими комиссиясенең гражданнар сәламәтлеген саклау һәм социаль яклау мәсьәләләре буенча беренче утырышы узды. Депутатлар Башкарма комитет һәм күзәтчелек органнары җитәкчеләре белән бергә яңа коронавирус инфекциясе һәм сезонлы респиратор вирус инфекцияләре таралуга бәйле вәзгыять турында фикер алыштылар.

Роспотребнадзорның Чаллы территориаль бүлеге җитәкчесе Илгизәр Бариев үз чыгышында билгеләп үткәнчә, хәзерге вакытта шәһәрдә коронавирус инфекциясенең лабораториядә расланган 880 очрагы теркәлгән, бу 100 мең кешегә 164,6 тәшкил итә. Авыручылар арасында 461 хатын-кыз (52,4%), ир-атлар арасында – 419 (47,6%). 59 пациент медицина күзәтүе астында тора, күзәтүдән 6820 кеше төшерелгән.

"Без сәламәтлек саклау идарәсенә 310 күрсәтмә бирдек, яшәү урыны буенча изоляция турында баш дәүләт санитар табибының 4233 карары һәм авыру очраклары чыккан урыннарда йомгаклау дезинфекциясен үткәрү турында 711 күрсәтмә әзерләдек", - диде ул.

Илгизәр Бариев шулай ук җәмәгать транспортында, кибетләрдә, җәмәгать туклануы пунктларында, шәхси клиникаларда һәм югары уку йортларында ачыкланган хокук бозулар буенча 97 беркетмә төзелүен хәбәр итте. 1 млн 950 мең сум күләмендә штраф салынган. Роспотребнадзор Эчке эшләр идарәсе белән берлектә чит илләрдән килгән гражданнар буенча эш алып бара. Эпидемиягә каршы чараларны үтәмәгән өчен 14 кешегә карата административ хокук бозу турында беркетмәләр төзелде.

"Контроль һәм күзәтчелек органнары тарафыннан күрелгән чараларга карамастан, җәмәгать урыннарында кешеләр барыбер шәхси саклану чараларыннан башка яши. Контрольдә тоту буенча эшне дәвам итәргә һәм көчләребезне берләштерергә кирәк дип саныйм", - диде шәһәрнең баш санитар табибы. Ул шулай ук халыкны сезонлы гриппка каршы вакциналаштыру буенча эш дәвам итә, дип ассызыклады. Әлегә шәһәр халкының өчтән бер өлешенә прививка ясатылган.

2020 елда яңа коронавирус инфекциясе таралуны профилактикалау максатларында шәһәр бюджетыннан резерв фонды акчалары хисабына 20 млн сумнан артык акча бүлеп бирелгән. Әлеге мәгълүматны финанслар идарәсе башлыгы урынбасары Гөлназ Хамаева җиткерде. Бу акчаларга 87 мең битлек, 264 контактсыз термометр, 15600 пар перчатка һәм 61 нурландыргыч сатып алынган.

Моннан тыш, сәламәтлек саклау оешмаларының медицина хезмәткәрләре өчен 11 000 пар бахил һәм 7 000 саклагыч костюм сатып алынган. Шулай ук, чикләүләр чорында, шәһәр бюджеты хисабына, социаль яктан якланмаган гаиләләрдән булган 1828 укучыга азык-төлек җыелмасы бирелде. Бүгенге көндә сәламәтлек саклау оешмаларының медицина хезмәткәрләре өчен тагын 1 000 саклагыч костюм сатып алуга муниципаль заказ урнаштырылган. Учреждениеләр биналарын һәм торак биналарны аеруча нәтиҗәле санацияләүне тәэмин итү максатыннан дүрт кайнар томан генераторы сатып алынды.

Икътисадый үсеш һәм эшмәкәрлеккә ярдәм күрсәтү идарәсе башлыгы Гүзәл Гыйләҗева шәһәрдә җитештерелә торган вирус инфекцияләрдән саклау чаралары турында сөйләде. Шулай итеп, «КАМАЗ» ААҖ ресурсларны шәхси саклану чараларын җитештерүгә өлешчә җибәрү турында карар кабул итте. Әйтик, автомобиль заводында эпидемиягә каршы махсус костюмнар һәм күп тапкыр куллану мөмкинлеге булган битлекләр тегү оештырылган. Запас частьләр заводында югары дәрәҗәдәге саклану ресираторлары җитештерү буенча автоматик линия урнаштырылган.

«Заманча технологияләр» предприятиесе автомат линияләрдә гигиена битлекләрен җитештерүне башлап җибәрде. Бүгенге көндә аена куәте 2 млн битлек тәшкил итә. Моннан тыш, «ТЭМПО» компаниясе рециркуляторлар - һаваны чистарту һәм зарарсызландыру өчен җайланмалар чыгаруны җайга салды. Чаллының «Элита-Проф» компаниясе кабина рәвешендә эшкәртү системасын серияле җитештерүгә җибәрде.

«Әлеге җиһазлар өслекләрне зарарсызландыру һәм өс киемен дезинфекцияләү максатыннан кулланыла», - дип аңлатты Гүзәл Гыйләҗева.

«Триада» ҖЧҖ һәм «Бросско» ҖЧҖ компанияләре Яр Чаллы медицина оешмаларына 6 мең саклагыч костюм һәм 11 мең пар бахил әзерләгән һәм тапшырган.

Мәгариф идарәсе башлыгы урынбасары Лидия Золотарева хәбәр иткәнчә, шәһәрдә 78 белем бирү учреждениесе, 129 мәктәпкәчә белем бирү учреждениесе һәм 13 өстәмә белем бирү учреждениесе эшли. "Бу елны без, барыннан да элек, мәгариф учреждениеләрендә дезинфекция чараларын үтәү һәм балалар өчен дә, педагоглар өчен дә барлык куркынычсызлык чараларын үтәү буенча Роспотребнадзор киңәшләрен башкарабыз", - дип ассызыклады ул.

Атна саен мәгариф идарәсе үзенә караган учреждениеләрне тикшерә. «Закон бозулар ачыкланса, мәгариф учреждениеләре җитәкчеләренә административ йогынты чаралары күрелә. Бүгенге көндә барлык учреждениеләрдә рециркуляторлар бар. Алар шәһәр буенча 445. Нигездә, алар медблокларда һәм азык-төлек блокларында урнашкан. Ноябрь башында без тагын рециркуляторлар алачакбыз, алар республика бюджеты хисабына сатып алыначак. Барлык белем бирү учреждениеләре контактсыз термометрларга ия», - дип өстәде Лидия Золотарева, шул ук вакытта эпидемия бусагасының бер генә сыйныфта да артмавын билгеләп үтте.

Тагын берничә докладчыны тыңлаганнан соң, депутатлар чаллылылар җәмәгать урыннарында битлекләрне кию буенча киңәшләрне массакүләм рәвештә игътибарсыз калдыруны дәвам итәләр, шул рәвешле үз сәламәтлекләренә, шулай ук туганнарының һәм якыннарының сәламәтлегенә куркыныч тудыралар, дигән нәтиҗәгә килделәр.

«Грипп, парагрипп, риновирус һәм аденовирус инфекцияләре, көзен безнең популяциягә килә торган башка инфекцияләр, беркая да югалмады. Бүген тагын коронавирус та өстәлде. Күрәсең, ул да беркая да китмәячәк һәм алда аталган авырулар кебек үк безнең юлдашыбыз булачак. Бүген безнең сулыш-тын юлы системабызга зарар китерергә мөмкин булган вируслар саны бик күп. Шуңа күрә көндәлек тормышта антисептиклар һәм битлекләр мәҗбүри атрибут булырга тиеш. Эпидемия процессы соңгы меңъеллыкта берничек тә үзгәрмәде: инфекция чыганагы, авыру бар. Вирус инфекциясен тапшыруның ике механизмы өстенлек итә: сулыш һәм контакт-көнкүреш. Беренче очракта саклану чарасы – битлек, икенчесендә – антисептиклар. Моны халыкка җиткерергә кирәк», – диде комиссия рәисе, Ашыгыч медицина ярдәме хастаханәсенең баш табибы Марат Мөхәммәдиев.