Наил Мәһдиев "Яр Чаллы" ТОСЭРы турында: капиталь кертемнәр суммасы 16,5 млрд сум тәшкил итте

Наил Мәһдиев Россия шәһәрләренең Икътисадый хезмәттәшлек һәм үсешен оештыру онлайн-марафоны кысаларында моношәһәрләр буенча сессиядә катнашучылар алдында чыгыш ясады. Киңәшмә видеоконференция режимында узды, анда Россия Икътисадый үсеш министрлыгының Региональ үсеш департаменты җитәкчесе урынбасары Игорь Голубинский, моношәһәрләр фонды вәкилләре, кайбер моношәһәрләр башлыклары катнашты.

Игорь Голубинский Яр Чаллы шәһәрен Россия моношәһәрләре арасында иң яхшы икътисадый күрсәткечләргә ия шәһәр буларак тәкъдим итте һәм шәһәр мэры Наил Мәһдиевкә сүз бирде. Билгеләп үтик, Яр Чаллы 2019 ел өчен  төзелгән моношәһәрләрнең еллык рейтингы ТОПында беренче баскычны биләп тора.

Наил Мәһдиев киңәшмәдә катнашучыларга "Яр Чаллы" ТОСЭРы эшчәнлеге нәтиҗәлелегенең төп күрсәткечләре турында сөйләде: "2016 елның гыйнварында без Россия моношәһәрләре арасында беренче булып, алгарышлы социаль-икътисадый үсеш территориясе статусын алдык. Без бу махсус режимнан ничек файдалана алдык? Хәзерге вакытта шәһәрдә 39 компания-резидент бар, капиталь кертемнәр суммасы 16,5 млрд сум тәшкил итә, 5 933 яңа югары технологияле эш урыны булдырылган. "Яр Чаллы"  алгарышлы социаль-икътисадый үсеш территориясе резидентларының барлык дәрәҗәләргә бюджет һәм бюджеттан тыш фондларга 5 млрд 300 млн сум күләмендә салым түләүләре кертелгән. Резидентларның салым түләүләре суммасы бүген бирелгән преференцияләр суммасыннан ике тапкыр артып китә", - дип ассызыклады Наил Мәһдиев.

Шулай ук Наил Мәһдиев билгеләп үткәнчә, «Яр Чаллы» ТОСЭРы резидентлары структурасында инвестицияләрнең 65%ы Россия компанияләренә карый. Әйтик, хәзерге вакытта «Чаллыда җитештерелгән» маркировкалы продукция экспортын ТОСЭРның җиде резиденты гамәлгә ашыра. Экспортланган продукция өлеше буенча лидерларның берсе - «ЗаряД» компаниясе, ул агымдагы елның 9 аенда 2 400 хоккей кәшәкәсен экспортлаган. Исегезгә төшерәбез, завод 2016 елның августында ачылды.

"Яр Чаллы" ТОСЭРының тагын бер резиденты экспорт географиясе буенча лидер булып тора – сүз «Акульчев» компанияләр төркеменең «Венские вафли» компаниясе турында бара. Ул үз продукциясен Кытай, Армения, Беларусь, Таҗикстан, Кыргызстан, Израиль, Монголия, Балтыйк буе һәм АКШ илләренә экспортлый.