Бүген Чаллы депутатлары IV чакырылыш Шәһәр Советының өченче утырышын
уздырды. Шәһәрнең 2021-2023 елларга социаль-икътисадый үсеш фаразы
турындагы доклад белән Башкарма комитет җитәкчесе урынбасары Наталия
Кропотова чыгыш ясады. Мәгълүматлар буенча, киләсе елга шәһәр буенча
сәнәгать продукциясе күләме 391,4 млрд сум, сәнәгать җитештерүе индексы
102,7% планлаштырыла.
Агымдагы ел ахырына төп капиталга инвестицияләр күләме якынча 70 млрд
сум тәшкил итәчәк, бу узган елдагыдан 5,4%ка кимрәк. 2020 ел бәяләве
буенча ВТПга инвестицияләр өлеше 30,6 % тәшкил итәчәк. 2021-2023 елларда
күрсәткечнең уңай динамикасы саклана.
Наталия Кропотова шәһәр сәнәгать паркларының актив үсеше турында
сөйләде: "Парклар барысы да диярлек тулы. Хәзерге вакытта өстәмә
мәйданчыкларда ихтыяҗ бар. Мәсәлән, бүгенгә 1,4 млн кв метр мәйданлы "Мастер" КИП территориясе тулысынча эшли, анда 300ләп резидент эшчәнлек алып бара.
Мәйданнарны киңәйтү зарурлыгы бар. Проектның гомуми бәясе якынча 815
млн сум тәшкил итәчәк. 20дән дә ким булмаган яңа производство урнаштырылачак. «Развитие» сәнәгать
паркы территориясе актив үсә. Әзер инфраструктуралы җир кишәрлекләренә
инвесторларның тотрыклы ихтыяҗы сәнәгать паркының өченче чиратын төзү
кирәклеген күрсәтә. Яңа мәйданчыкны үзләштерү 15тән дә ким булмаган яңа
производство булдырырга һәм кимендә 800 млн сум күләмендә инвестицияләр
җәлеп итәргә мөмкинлек бирәчәк", - дип хәбәр итте спикер.
Наил Мәһдиев сәнәгать паркларын үстерү кирәклеген билгеләп үтте: "Кайбер
сәнәгать паркларында резидентлар юк. Бездә башка күренеш: сәнәгать
парклары җитми. Бүген эшмәкәрләр чиратка басу өчен тора. Бу бит яхшы
тенденция. Ике атна элек без бу паркларга килергә әзер булган потенциаль
резидентлар белән сөйләшүләр уздырдык", - дип ассызыклады мэр.
При использовании информации просьба ссылаться на Управление информационной политики и по связям с общественностью.
Сишәмбе, 15 декабрь 2020, 16:39