Казан һәм Татарстан митрополиты Кирилл Чаллыда православие гимназиясе төзелешен карады

Бүген Чаллыга эш визиты белән Казан һәм Татарстан митрополиты Кирилл килде. Шәһәр мэры Наил Мәһдиев белән бергә ул Раскольников урамындагы «Святой Великомученик Георгий Победоносец» прихода территориясендә төзелә торган православие гимназиясенең төзелеш эшләре барышы белән танышты.

Мәгариф учреждениесе өч каттан булыр дип планлаштырыла. Беренче катта кече сыйныфлар, икенче катта – өлкән сыйныф укучылары, ә мансардныйда укытучылар һәм китапханә урнашачак. Хәзерге вакытта подвал өлешендә төзелеш эшләре бара.

Гимназия мәхәллә кешеләре акчасына төзелә. Наил Мәһдиев объект төзелешенә исәп-хисап счеты ачылуы белән кызыксынды, әлеге процедураны рәсмиләштерергә тәкъдим итте: «Без барыбыз да әлеге исәп-хисап счетына үз өлешебезне кертәчәкбез, шул исәптән мин дә. Кемдер акча түгел, ә арматура, бетон белән ярдәм итә ала. Без моның кирәкле һәм мөһим объект икәнлеген аңлыйбыз, шуңа күрә төзелешкә ярдәм итәчәкбез».

Белем бирү учреждениесенең сыйдырышлыгы 200-300 укучы булыр дип көтелә.

 "Бүген безнең приходларда булган уй – монда яхшы мәктәп ясау, ул тормышка ашырылыр дип өметләнәм, – дип уртаклашты Казан һәм Татарстан митрополиты Кирилл, объект төзелешен бәяләп.  – Биредә кешеләр җаваплы. Бу объект яхшы гомуми белем бирү мәктәбе һәм әхлакый-патриотик тәрбия мәктәбе булырга мөмкин".

 Яр Чаллыда гимназия төзелеше 2020 елда башланган иде. Гимназия Кама аръягы төбәгендә рухи белем бирү үзәге булыр дип планлаштырыла. Уку йорты «рус классик мәктәбе» белем бирү системасы кысаларында үз эшчәнлеген алып барачак.