Чаллыда гомер итүче Бөек Ватан сугышы ветеранын 95 яшьлек юбилее белән котладылар

РФ Президенты Владимир Путин, шәһәр мэры Наил Мәһдиев, Үзәк районы администрациясе башлыгы Искәндәр Галимов исеменнән Бөек Ватан сугышы ветераны Әнәс Сәлах улы Сәлаховны 95 яшьлек юбилее белән котладылар. Котлауларга Шәһәр Советы депутаты Рөстәм Гайнуллов, шулай ук ТИҮ рәисе Людмила Багрецова да кушылды.

Актаныш районының Иске Айман авылында туган Әнәс Сәлах улы Сәлаховка 95 яшь тулды. Бөек Ватан сугышына кадәр ул туган авылы мәктәбендә укытучы булып эшләгән. 1941 елда Спас педагогия училищесын тәмамлый. 1943 елда Совет Армиясе сафларына алына. Хезмәтен Байкал арты Ерак Көнчыгыш фронтында башлый, Монголияне, Манчжурияне азат итүдә катнаша.

Сугыштан соң Ерак Көнчыгышта сержант исемендә хезмәт итә. Полковой мәктәбендә кече командирларны әзерли һәм взвод командиры урынбасары була. 1950 елда демобилизацияләнә, туган авылына кайта. 1953 елда өйләнә. 1954-1962 елларда Пермь крае Березники шәһәренең леспромхозында – завхоз була. 1962 елда туган авылында кибеттә сатучы булып эшли. 1974 елда Яр Чаллыга күчеп килә һәм пенсиягә чыкканчыга кадәр КамГэсэнергостройда хезмәт куя.

Әнәс Сәлах улы 3 бала тәрбияләп үстергән, 7 оныгы һәм 5 оныкчыгы бар. «Сугышчан казанышлары өчен», «Батырлык өчен», «Японияне Җиңгән өчен», «II дәрәҗә Ватан сугышы Ордены» медальләре, юбилей даталарына медальләр белән бүләкләнгән.