Яр Чаллыдан ике укытучы борынгы Кырым сәнгатен – келәм тукуны үзләштергән. Келәм өчен буяулар каен яфракларыннан, гөлҗимеш тамырларыннан, меңъеллык үләненнән ясала.
Кырым бакчасында 1 нче балалар сәнгать мәктәбе укытучылары Мамут Чурлу җитәкчелегендә булачак келәмнәрнең эскизларын ясаганнар, төрле төсләр бирә торган үсемлекләрне өйрәнгәннәр.
Узган елның җәй һәм көз айларында укытучылар буш вакытларын республикабыз болыннарында үткәргәннәр. Алар үләннәр, яфраклар, тамырлар җыйганнар. Табигый буяулар зарарсыз һәм чыдамрак.
Буяу – иң читен эш түгел. Укытучылар өч ай дәвамында Кырым остасы биргән өй эшен – келәм тукуны мөстәкыйль рәвештә башкарганнар.
«Әзер келәм белән Казанга симпозиумга бардык. Безнең эшләр Мамут Чурлуны да сөендерде. Ул бу игелекле эшне Татарстанда, дустанә республикада дәвам итәчәкләренә бик шатланды», - дип уртаклашты укытучылар.
1 нче балалар сәнгать мәктәбе укытучылары бу сәнгатькә балаларны өйрәтергә планлаштыралар. Шулай ук туку станоклары сатып алырга ярдәм итәчәк хәйриячеләрне эзлиләр. Боларның барысы да балалар милли, әби-бабайларның гореф-гадәтләрен онытмасын өчен эшләнә.
При использовании информации просьба ссылаться на Управление информационной политики и по связям с общественностью.
Чәршәмбе, 9 март 2022, 12:16