Наил Мәһдиев торак йортын реконструкцияләү барышы белән танышты

Бүген шәһәр мэры Наил Мәһдиев 51/01 торак йортында ике подъездны реконструкцияләү барышы белән танышты. Ремонт эшләре 17 фатирда бара. Объектның әзерлеге 80% тәшкил итә.

2004 елда 38 һәм 39 подъездлар авария хәлендә дип табылган, биредә яшәүчеләрне 58/12 йортына күчергәннәр. Авария хәлендәге фатирларда җылылык өзелү сәбәпле, күрше подъездларда яшәүчеләр дә зыян күрде. Алар туңган стеналар һәм һаваның түбән температурасына зарландылар.

Йортны торгызу максаты белән аның торышына бәя бирелде, фундаментны ныгыту проекты һәм кирәкле ремонт эшләре әзерләнгән.

Бүген төзүчеләр бу биналарны агымдагы елның апрель ахырында ук тапшырырга әзер булуларын хәбәр иттеләр.

«Бу-муниципаль торак фондының 17 фатиры. Аларның бер өлеше хастаханәләргә һәм поликлиникаларга  белгечләр җәлеп итү өчен хезмәт торагы буларак файдаланылачак. Алар биредә социаль ипотека буенча торак алганчы вакытлыча яшәп торачаклар», - дип аңлатты Наил Мәһдиев, журналистларның сорауларына җавап биреп.

Подъездларда ремонтны "Синең йорт" компаниясе алып бара. Барлык фатирларда да тәрәзәләр алыштырылган, бүлмәләрдә декоратив бизәкләү эшләре башкарылган. 

Барлык кухняларда да кафель плиткасы җәеләчәк.