Чаллыда "Безнең ишегалды" программасына йомгак ясадылар

Бүген аппарат киңәшмәсе кысаларында Башкарма комитет җитәкчесенең беренче урынбасары Илья Зуев "Безнең ишегалды" республика программасының эш нәтиҗәләре турында сөйләде. Өч ел эчендә Чаллыда 338 ишегалды территориясе үзгәртеп корылган. Традиция буенча, башта халык белән барлык детальләр буенча фикер алышканнан соң, төзүчеләр эшкә керешкән. Быел «Безнең ишегалды» программасы буенча 84 ишегалды территориясен төзекләндерү планлаштырылган. Шунысын да билгеләп үтәргә кирәк, 15 апрельдән алып 30 майга кадәр шәһәрдә яшәүче һәркем Татарстан Республикасы Дәүләт хезмәтләре порталында һәм «ТР Хезмәтләре» мобиль кушымтасында төзекләндерүгә мохтаҗ ишегаллары өчен тавыш бирә алды. Чаллының 19 ишегалды ТОП-200 республика ишегалдына эләккән, шуңа күрә аларда ремонт элегрәк планлаштырылган сроклардан иртәрәк башкарылачак. "Әгәр дә шәһәрдәшебез ишегалдын чиста, пөхтә тоту максатын куйса - без бу эштә ярдәм итәчәкбез. Юлларга һәм тротуарларга асфальт җәю, яңа яктырту чаралары урнаштыру, балалар мәйданчыклары, ТКО мәйданчыклары һәм яшелләндерү эшләре алып бару. Калганын - халык үзе хәл итә", - дип билгеләде шәһәр мэры Наил Мәһдиев. 

 Агымдагы елда 119 ишегалды территориясе төзекләндерелгән. 1,5 млрд сумлык 471,7 мең квадрат метр юл һәм тротуар ремонтланган, 185 млн сумлык тышкы яктырту челтәре тулысынча алмаштырылган, шундый ук суммага балалар, спорт һәм урам җиһазлары монтажланган. Шуны да билгеләп үтәргә кирәк, яшел үсентеләр максималь рәвештә саклана, агачларны кисү, саклау һәм яшел үсентеләрне торгызу комиссиясе белән килештерелгәннән соң башкарыла. Киселгән яки зыян күргәне урынына икенче яшеллек утыртыла, бер агач урынына өч агач барлыкка килә. Соңгы өч елда шәһәр территориясендә 7 371 агач һәм куак утыртылган. Агачлар шулай ук Чулман һәм Яр Чаллы проспектлары, Академик Королев, Шамил Усманов һәм Иске Сарман урамнары буенда утыртылган. 

 Ишегалды территорияләрен яшелләндерү эшләре идарәче компанияләрне җәлеп итеп алып барыла. "Тзекләндерелгән ишегалларына икенче сулыш өрү" проекты кысаларында «Автомобиль юллары предприятиесе» МУП көче белән 32/05 һәм 50/01 йортлар ишегалларында ике трансформатор подстанциясе дивары рәсем белән бизәлгән. Инициатива резидентларда тулы хуплау тапты. Проект масштабын яшьләрне ишегалларында хуҗалыкка җәлеп итү, агачлар утырту, чәчәк түтәлләрен бизәү һәм мастер-класслар оештыру юлы белән киңәйтү планлаштырыла. 

Ишегалды территорияләрен төзекләндерү эшләре тәмамланганнан соң район администрацияләре вәкилләре, йортлар буенча өлкәннәр, территориаль иҗтимагый үзидарә органнары рәисләре һәм актив яшәүчеләр белән берлектә Ишегалды бәйрәмнәре үткәрделәр, аларда шәһәр халкы яхшы һәм оператив эш өчен подрядчы оешмаларга рәхмәт белдерде, концерт номерлары һәм тәмле ризыклар әзерләде.