Яр Чаллы шәһәре Яңа елга әзер

30 декабрьдән 8 гыйнварга кадәр укучылар күңел ачу чараларында катнаша ала.

Мәктәпләрдә һәм балалар бакчаларында барлык яңа ел программалары  бушлай була. Бу хакта аппарат киңәшмәсе барышында Башкарма комитет җитәкчесе урынбасары Рамил Хәлимов хәбәр итте.

18-27 декабрьдә 8 меңгә якын яшь Чаллы балалары өчен Яр Чаллы Хакименең чыршы бәйрәмнәре узачак.

Анда инвалид балалар, аз керемле гаиләләрдәге балалар, иҗтимагый оешмалар активистлары һәм уку отличниклары, мобилизацияләнгән гражданнар балалары була.

Быел Республика Яңа ел чыршысына Чаллыдан 1053 укучы барачак. Мондый мөмкинлеккә уку, спорт алдынгылары, иҗтимагый тормыш активистлары һәм хәрби операциядә катнашучы шәһәрдәшләребезнең балалары лаек. Алар өчен 25 декабрьдә «Татнефть Арена» боз сараенда бәйрәм чарасы үтәчәк.

Кышкы каникулларда «Яңа ел хыялы» шәһәр хәйрия акциясе уза.

Аның максаты - авыр тормыш хәлендә калган балаларның Яңа ел хыялын тормышка ашыру.

Яр Чаллы шәһәре Хакиме  Наил Мәһдиев, Шәһәр Советы депутатлары, Чаллы Башкарма комитет хезмәткәрләре «Теләкләр чыршысы» акциясендә катнашты. Алар «Асылташ» балалар һәм яшүсмерләр өчен социаль приютта тәрбияләнүчеләрнең теләкләрен чыршыдан алды. Агачта барлыгы 70 шундый шар булды.