Яшь патриотлар: 98 нче балалар бакчасында строй һәм җыр бәйгесе

98 нче «Балачак планетасы» балалар бакчасында Ватанны саклаучылар көненә багышланган һәм инде традициягә әверелгән строй һәм җыр бәйгесе узды.

Мәктәпкә әзерлек төркемнәрендә тәрбияләнүчеләр строй әзерлеге буенча осталыкларын күрсәттеләр: командир биргән боерыкларны үтәүдә, бердәм адым белән маршта йөрүдә һәм строй җырын башкаруда үзләрен сынатмадылар. Барлык командалар да лаеклы чыгыш ясады, җаваплылык, максатчанлык һәм командада эшли белү кебек иң яхшы сыйфатларын күрсәттеләр.

Бәйрәм чарасы Россия Федерациясе һәм Татарстан Республикасы гимннары белән башланып китте. Чараның матур бизәге булып әзерлек төркеме балалары башкаруындагы «Пусть будет небо мирным» җыры яңгырады.

Балаларда аеруча соклану хисе уяткан чыгыш — И. Маннанов исемендәге 82 нче кадет мәктәбе укучылары тәкъдим иткән «Карабинчылар төркеменең парад строй расчёты» һәм «Спецназ» күрсәтмәләре булды.

Әлеге чара «Яшьләр һәм балалар» милли проекты максатларына туры китереп үткәрелә. Ул Россия гражданнарының патриотик рухлы, югары әхлаклы һәм җаваплы буынын формалаштыруга, илнең суверенитетын, көндәшлеккә сәләтен һәм алга таба үсешен тәэмин итә ала торган яшьләр тәрбияләүгә юнәлтелгән.