QR-кодлы электрон пенсия таныклыклары пенсионерларның тормышын җиңеләйтә

Россиядә дәүләт сервислары белән хезмәттәшлекне һәм ташламалар алуны тагын да уңайлырак итә торган яңа цифрлы инструментлар барлыкка килде. Сүз «Госуслуги» порталын Max мессенджеры белән интеграцияләү һәм пенсионерның цифрлы QR кодын кертү турында бара.

Электрон пенсия таныклыгы - традицион пластик таныклыкның, белешмә яки пенсия кенәгәсенең заманча цифрлы аналогы ул. Яңа формат пенсионерларга пенсия билгеләнгәнлекне  кәгазь документлар күрсәтеп тормыйча гына электрон рәвештә расларга  мөмкинлек бирә.

Электрон таныклыкта аның хуҗасы турында төп мәгълүмат: фамилиясе, исеме, атасының исеме, шәхси исәп номеры, пенсия төре, аның билгеләнү срогы һәм пенсионерның фотосурәте бар. Барлык мәгълүматлар Россия социаль фондының саклаулы  мәгълүмат системасында саклана.

Документны "Дәүләт хезмәтләре" порталында һәм мобиль кушымтада шәхси кабинетта алырга мөмкин. Кулланучыларга уңайлы булсын өчен таныклыкка автомат рәвештә социаль фонд мәгълүматлары нигезендә формалаша торган уникаль QR-код кушылган.

QR-код аның хуҗасы турындагы мәгълүматның дөреслеген тиз арада расларга мөмкинлек бирә. Һәр код уникаль һәм ялганнан сакланган, бу шәхси мәгълүматларның өстәмә куркынычсызлыгын тәэмин итә. QR-кодның гамәлдә булу вакыты чикләнгән, шуңа күрә аны вакыт-вакыт яңартып торырга кирәк.

Россия Социаль фондының Татарстан Республикасы буенча бүлеге идарәчесе Эдуард Вафин сүзләренчә, цифрлы форматны кертү гражданнарның дәүләт структуралары белән үзара хезмәттәшлегенең уңайлылыгын һәм куркынычсызлыгын арттыра:

"Электрон пенсия таныклыгы - кәгазь документны электрон вариантка алмаштыру гына түгел, ә сервисның яңа дәрәҗәсе ул. Ул гражданнарга һәрвакыт  үз статусын раслау мөмкинлеге бирә һәм хезмәт күрсәтүләргә һәм социаль ярдәм чараларына керүне гадиләштерә. Цифрлы формат мәгълүматны ышанычлы яклауны тәэмин итә һәм кулланучылар өчен хезмәтләрдән  максималь уңайлы файдаланырга мөмкинлек бирә ".

Электрон пенсия таныклыгын кулланышка кертү дәүләт хезмәтләреннән файдалануны гадиләштерүгә, үтә күренмәлелекне арттыруга һәм кәгазьсез документлар әйләнешен үстерүгә юнәлдерелгән.

Гариза статусын тикшерү яки мөһим белдерүләр турында белү өчен «Госуслуги» порталындагы шәхси кабинетка керергә кирәкми. Боларның барысын да хәзер MAX мессенджерында «Госуслуги» боты чаты аша карарга мөмкин.

Моннан тыш, MAX «дәүләт хезмәтләре»нә кергәндә өстәмә куркынычсызлык дәрәҗәсен тәэмин итә. Авторизация вакытында мессенджер тикшерү сорауларын бирә-бу мошенниклык омтылышларын ачыкларга ярдәм итә. Ә керү уңышлы булгач, портал белән эш тизрәк бара: мәгълүматларны тиз арада тутырырга һәм документларны цифрлы имза белән расларга мөмкин.

Хәбәрнамәләрне ничек тоташтырырга:

1. MAXка бәйләнгән телефон номерының «дәүләт хезмәтләре»профилендәге номер белән туры килүен тикшерегез.

2. Номерларның система тарафыннан туры килүен автомат рәвештә раслауны көтегез.

3. «Госуслуги» порталында шәхси кабинетта белдерүләр төрләрен көйләгез — сезнең өчен чыннан да мөһим булганны гына сайлагыз.

Пенсионерлар үз статусын раслый һәм цифрлы QR коды ярдәмендә ташламалар ала ала. Бу гадәти документларга алмаш түгел, ә уңайлы альтернатива — кайсы форматны кулланырга икәнен һәркем үзе хәл итә.

QR код кайда кирәк булачак: кибетләрдә һәм даруханәләрдә ташламалар алганда; музейларга, күргәзмәләргә һәм театрларга ташламалы бәядән барганда; җәмәгать транспортында ташламалы йөрү хокукын раслау өчен.

Инде хәзер QR коды «Магнит» ваклап сату челтәрендә уңышлы эшли: сервис бөтен ил буйлап 15 мең кибеттә 50 мең кассада карала. Пенсионерларга башка документлар эзләргә яки ярдәм сорап хезмәткәрләргә мөрәҗәгать итәргә кирәкми-телефон экранында кодны күрсәтү дә җитә. Киләчәктә функционалны студентларга һәм күп балалы гаиләләргә киңәйтергә планлаштыралар.