Грант эшчәнлеге йомгаклары: уңышлар һәм яңа мөмкинлекләр

Яшьләр белән эшләү идарәсе башлыгы Ләйсән Видинеева проект эшчәнлеген гамәлгә ашыру турында доклад тәкъдир итте. Ул грант эшләре йомгакларын атады һәм үсешнең төп юнәлешләрен билгеләде: «Нәкъ менә яшьләр проектлары хәзерге заман яшьләрен актив тормыш позициясе формалаштыруга юнәлдерелгән социаль әһәмиятле эшчәнлеккә җәлеп итү өчен оптималь шартлар тудыра һәм шәһәр тормышын социаль-икътисади үстерүдә сизелерлек нәтиҗә бирә».

Яр Чаллы яшьләре республикада иң активларның берсе булу статусын тагын бер кат раслады. Үткән ел йомгаклары буенча шәһәребез вәкилләре ел саен төрле грант конкурсларының җиңүчеләре һәм призерлары була. Идеяләрне тормышка ашыру өчен җәлеп ителгән акчаларның гомуми суммасы 17 миллион сумнан артты, бу 27 уникаль проектны гамәлгә ашырырга мөмкинлек бирде.

Киңәшмәдә 2025 ел йомгакларына аерым игътибар бирелде. Татарстан Республикасының яшьләр сәясәте муниципаль учреждениеләре өчен грантлар конкурсында 4 050 000 сум күләмендә финанс ярдәме алган дүрт инициатива җиңү яулады.

Шәһәр ярдәме белән гамәлгә ашырылган якты проектлар арасында Ләйсән Видинеева берничә төп проектны аерып күрсәтте. «Студент яшьләр өчен "Талантлар мозаикасы" чаралар комплексы» проекты зур җавап тапты. Аның төп вакыйгасы итеп Азәрбайҗан, Төрекмәнстан, Нигерия, Белоруссия һәм башка илләрдән яшьләрне җыйган чит ил студентлары форумы булды.

«Укырга килүче студентлар өчен яңа тормыш хәленә җайлаша белү, аны кабул итү, ә үз тәртипләрең белән килмәү мөһим. Безгә исә төрле мәдәниятләр яшьләр мохитендә яңа мәдәни атмосфера формалаштыруын аңлау мөһим, һәм ул гармонияле һәм уңай булыр дип ышанасы килә», – дип ассызыклады спикер форум максатлары турында сөйләгәндә.

Патриотик эш тә игътибардан читтә калмады. Җиңүнең 80 еллыгы елында «Җиңү көче: үткәннән киләчәккә» чаралар циклы гамәлгә ашырылды. Отылган грант ярдәмендә «Зарница 2.0» уены җиңүчеләре Мәскәүгә бардылар, «Патриот» паркында булдылар һәм мемориаль «Хәтер юлы» буйлап уздылар. Моннан тыш, Җиңү паркында «Зур Кечкенә Геройлар» стенд композициясе – Бөек Ватан сугышы балалары-геройларына багышланган 20 урам экспозициясе барлыкка килде.

Грант ярдәмен учреждениеләр генә түгел, физик затлар да алды. Мәсәлән, «Шатлык» яшьләр үзәге базасында «ЯR-Арт заманча сәнгать лабораториясе» уңышлы узды. Проектның төп нәтиҗәсе итеп тугыз яңа арт-объект булдыру тора, аларның дүртесе инде Яр Чаллының иҗтимагый киңлекләрен бизи. Быел проект шәһәрнең 400 еллыгы алдыннан эшен дәвам итәчәк.

Медиасфера да үсә. СТУДПРОФ.РФ порталы командасы «Родноймаршрут.рф: новый сезон» проектын гамәлгә ашырып, Татарстан һәм Россия истәлекле урыннары турында видео чыгарды. Һәр ролик 100 меңнән артык карау җыйды, ә заставканы ТР халык артисты Рәфикъ Каюмов яңгыратты.

Докладта талантлы студентларга ярдәм итү темасы аерым юл белән үтте. Яр Чаллы югары уку йортларының җиде студенты «Студентлар стартапы» федераль конкурсы җиңүчеләре булып, 1әр миллион сум акча алды. Алар арасында – инженерлар өчен мобиль кушымта булдырган Егор Фомин һәм Татарстанда эчке туризмны үстерү өчен Казан, Яр Чаллы, Түбән Кама һәм Алабуга турында мәгълүматны берләштергән кушымта эшләп чыгарган Венера Дәүләтшина.

Яр Чаллы грант конкурсларында катнашып кына калмыйча, аларны үзе дә үткәрүен билгеләп үтү мөһим. Шәһәр мэры Наил Мәһдиев инициативасы белән җирле бюджеттан «Беренчеләр инициативасы» конкурсына 2 млн сум акча бүлеп бирелде. Проектның уникальлеге шунда: 22 команда үз идеяләрен муниципаль учреждениеләр белән берлектә тормышка ашыру өчен грантлар алды.

«Балалар һәм өлкәннәрнең тигез хокуклы эшлекле партнерлыгының мондый формасы – Татарстанда аналоглары булмаган яңа күренеш. Сезгә, Наил Гамбәр улына, мондый мөмкинлек өчен рәхмәт», – дип мөрәҗәгать итте Ләйсән Видинеева шәһәр мэрына.

Доклад ахырында идарә башлыгы проектларның уңышы акча белән генә түгел, ә төзелгән инфраструктура белән дә тәэмин ителүен билгеләп үтте. Шәһәрдә яшьләр үзәкләре челтәре эшли («Заман», «Нур», «Орион», «Шатлык», «Подросток»), анда проект офислары ачылган. Анда яшьләр грантларга гаризалар язарга бушлай өйрәнә ала. 2025 елда 15 уку сессиясе һәм "Росмолодежь.Гранты" экспертлары белән 2 семинар үткәрелде. Гамәлдәге конкурслар турында яшьләр белән эшләү идарәсенең  рәсми интернет-каналларыннан белергә мөмкин.