Бүләкләү тантанасы Г. Камал исемендәге театрның яңа бинасында Туган тел көне һәм татар әдәбияты классигы Габдулла Тугайның тууына 140 ел тулу уңаеннан узды. Чарада Татарстан Республикасы Рәисе Рөстәм Миңнеханов һәм Татарстан Дәүләт киңәшчесе Минтимер Шәймиев катнашты.
Татарстан Республикасы Рәисе Рөстәм Миңнеханов Указы белән Яр Чаллыдан шагыйрә Лилия Сираевага (укучыларга Лилия Гыйбадуллина буларак билгеле) «Дәвамы бар» шигырьләр һәм поэмалар җыентыгы өчен премия тапшырылды.
Премия лауреаты чаллылыларга, Татарстан Республикасы хөкүмәтенә, Яр Чаллы шәһәре җитәкчелегенә, Татарстан Язучылар берлегенең шәһәр бүлегенә, аның кандидатурасын бертавыштан тәкъдим иткән өчен, чын күңелдән рәхмәтен белдерде: «Шәһәрнең юбилей елында премияне шәһәр вәкиле булып оту – бу зур җаваплылык. Мин үз укучым, шәһәр, республика, Тукай сүзе алдында тугры калырмын».
Җыелганнар алдында чыгыш ясап, Рөстәм Миңнеханов шагыйрь шәхесенең даирәсен ассызыклады һәм стратегик мәдәни бурычларны билгеләде: «Габдулла Тукай – бөтен төрки дөнья өчен әһәмиятле шәхес. Алда безне зур бурыч көтә – шагыйрьнең 150 еллыгына әзерләнү. Бу юнәлештә эш инде алып барыла. Бәйрәмне Бөтенроссия дәрәҗәсендә уздыруны планлаштырабыз. Россия Президентының тиешле Указы көтелә. Шулай ук Габдулла Тукай исемендәге премиягә халыкара статус бирү мөмкинлеге дә карала».
При использовании информации просьба ссылаться на Управление информационной политики и по связям с общественностью.
Якшәмбе, 26 апрель 2026, 13:50