Г.М. Хәкимова исемендәге Яр Чаллы картиналар галереясенең зур залында Халыкара педагог-рәссамнар берлегенең «Родники радости» күргәзмәсе ачылды. Экспозиция Россия халыклары бердәмлеге елына багышланган. Чара «Молодёжь и дети» милли проекты кысаларында уза, ул иҗади инициативаларны хуплауга, патриотик тәрбия бирүгә һәм яшьләрнең мәдәни кыйммәтләргә ирешү мөмкинлеген киңәйтүгә юнәлдерелгән. Күргәзмәне «Пушкин картасы» тотучылары – 14тән 22 яшькә кадәрге яшьләр карый ала. Бу программа федераль бюджет исәбенә музейлар, театрлар һәм күргәзмәләрне бушлай карарга мөмкинлек бирә.
12 ел дәвамында 2 нче балалар сәнгать мәктәбе базасында Халыкара педагог-рәссамнар берлегенең региональ вәкиллеге уңышлы эшли. Бу вәкиллекне оештыру инициаторы булып мәктәп директоры, Халыкара педагог-рәссамнар берлеге әгъзасы Марина Белкина чыккан. Нигез салынганнан алып бүгенге көнгә кадәр региональ бүлекчә белән Татарстан Республикасының атказанган укытучысы Гүзәл Шәрәфетдинова җитәкчелек итә. Хәзерге вакытта Берлекнең региональ вәкиллегендә 124 катнашучы исәпләнә.
Күргәзмә ачылышы җылы, рухландыргыч атмосферада узды. Вернисажда катнашучылар һәм кунаклар белән картиналар галереясе директоры Илсия Заһидуллина, Яр Чаллы дәүләт педагогика университеты доцентлары Светлана Большакова һәм Наталья Амирова, шәһәрнең көллиятләре һәм рәссамнары сәламләшеп, котлады.
Яр Чаллы сәнгать көллияте 4 курс студентлары Борис Хромушинның (балалайка) һәм Айнур Габдрахмановның (баян) башкаруындагы музыкаль бүләк чараның ачык бизәге булды.
Күргәзмә 24 майга кадәр дәвам итәчәк.
При использовании информации просьба ссылаться на Управление информационной политики и по связям с общественностью.
Җомга, 8 май 2026, 09:20