Яр Чаллыда Бөек Ватан сугышында Җиңүнең 81 еллыгына багышланган Җиңү парады башлана. Оештыруда студентлар һәм кадетлар, техника, атлы гаскәр катнаша.
Парад Россия Федерациясе дәүләт байрагы, Җиңү байрагы, Татарстан Республикасы байрагы һәм Яр Чаллы шәһәре байрагы астында үтә. Байракларны Яр Чаллы кадет мәктәпләренең укучылары һәм Яр Чаллы политехник көллияте студентлары чыгара.
Шәһәр мэры Наил Мәһдиев җыелучыларны бәйрәм белән котлады:«Хөрмәтле чаллылылар һәм шәһәр кунаклары, кадерле фронтовиклар һәм тыл хезмәтчәннәре! Сезне Җиңү көне белән котлыйм! Һәрберебез өчен 9 Май – иң мөһим, иң кадерле халык бәйрәме. Бу горурлык, хәтер һәм рәхмәт көне. Ул буыннарны берләштерә, тынычлыкның кадерен, рух көчен һәм халкыбызның җиңелмәс бердәмлеген искә төшерә. Гомуми Җиңүгә чаллылылар да үз өлешләрен керттеләр.
Хөрмәтле ветераннар! Без сезнең белән горурланабыз һәм сездән үрнәк алабыз! Сезнең батырлыгыгыз һәр чаллылының йөрәгендә мәңге саклансын һәм балаларга, оныкларга һәм оныкчыкларга тапшырылсын өчен, без бөтен көчебезне куярбыз. Киләчәк буыннар да Ватанны шулкадәр нык яратыр, гореф-гадәтләрен саклар һәм бабаларының үлемсез батырлыгын һәрвакыт истә тотар дип ышанам. Җиңү көне безне берләштерә һәм теләсә нинди сынаулар алдында җиңелмәс итә!
Бүген илебез авыр чорлар кичерә. Махсус хәрби операция чаллылыларны берләштерә, Яр Чаллының битараф булмаган һәм актив кешеләр шәһәре икәнен тагын бер тапкыр раслый. Без хәрби хезмәткәрләребез белән горурланабыз!».
Татарстан Республикасында бала хокуклары буенча вәкаләтле вәкил Светлана Захарова Татарстан Республикасы Рәисе Рөстәм Миңнехановның котлавын укыды.
При использовании информации просьба ссылаться на Управление информационной политики и по связям с общественностью.
Шимбә, 9 май 2026, 10:20