Яр Чаллыда «Минем яраткан шәһәрем» конкурсы җиңүчеләре бүләкләнде

Яр Чаллы шәһәренең нигезләнүенә 400 ел һәм беренче КАМАЗ йөк автомобиле чыгарылуга 50 ел тулу елында татар журналистлары арасында «Минем яраткан шәһәрем» конкурсы узды. Җиңүчеләрне бүләкләү тантанасы Аяз Гыйләҗев исемендәге Яр Чаллы дәүләт татар драма театрында узды.

Чарада Россия Федерациясе Дәүләт Думасы депутаты Әлфия Когогина, Башкарма комитет җитәкчесе урынбасары Винер Харисов, «Чаллы икмәге» компаниясенең генераль директоры Рафаэль Юнысов, «Татмедиа» ААҖ генераль директоры Шамил Садыйков, ТР Язучылар берлегенең Яр Чаллы бүлекчәсе җитәкчесе, Г. Тукай исемендәге республика премиясе лауреаты Факил Сафин һәм башка мактаулы кунаклар катнашты.

Оештыручылар булып «Шәһри Чаллы» газетасы редакциясе, шәһәр хакимияте, Бөтендөнья татар конгрессы һәм «Чаллы икмәге» компаниясе генераль директор Рафаэль Юнысов ярдәмендә чыгыш ясадылар.

Россия Федерациясе Дәүләт Думасы депутаты Әлфия Когогина мондый мөһим чараны үткәрүнең югары дәрәҗәсен билгеләп үтте: «Татар теленең әһәмияте бик зур, ә халыклар дуслыгы – Россиядә иң зур байлык».

«Татмедиа» генераль директоры Шамил Садыйков Яр Чаллыда татар рухы көченең әһәмиятен белдерде: «Безнең Яр Чаллыда татар рухы көчле, ул һәрвакыт Казаннан узып китәргә омтыла. Яр Чаллы матур бәйрәм үткәрде».

Конкурска 40тан артык эш җибәрелгән. Бөтендөнья татар конгрессының Яр Чаллы бүлекчәсе җитәкчесе, шагыйрь, Г. Тукай исемендәге премия лауреаты Факил Сафин җитәкчелегендәге жюрига җиңүчеләрне билгеләү авыр булды. «Бу бик авыр эш иде. Безгә өч тапкыр җыелырга туры килде», – дип сөйләде Факил Сафин.

Бөтендөнья татар конгрессы җитәкчесе урынбасары Ирек Шәрипов чаллыларның милли чараларда һәрвакыт актив булуын билгеләп үтте. Ул җиңүчеләргә бүләкләр алып килгән иде. Ирек Шәрипов "Матур телле журналист" номинациясендә җиңгән, матбугат ветераны, 87 яшьлек Заһидә Нәбиуллинаның иңенә Оренбург шәле япты. 

Башка номинацияләрдә түбәндәгеләр җиңде: "Күпмилләтле Чаллы" - Резидә Камалова, Гөлназ Хәбибуллина, Рәзинә Насыйбуллина; "Чаллы брендлары" - Гүзәл Мәрдәнова, Гөлчәчәк Титова; "Чаллы шәһәрдәшләр күзлегеннән" - Айзирә Бадикова, Зөлфия Галимова; "Чаллы-заманча шәһәр" - Илшат Солтанов; "Шәһәребез геройлары" - Әлфия Ситдикова, Сәрия Гарипова; "Яр Чаллы традицияләре" - Резидә Гасыймова, "Чаллы фотоларда" - Динара Шакирҗанова; "Туган шәһәрем тарихы" - Римма Әхмәтова, Гүзәл Габдуллина.  Җиңүчеләргә дипломнар һәм премияләр тапшырылды.

Концерт программасын «Болгар» бию театры, «Эврика» шәһәр мәдәният үзәге артистлары, «Гжель» балалар ансамбле, Татарстанның атказанган артистлары Габидулла Хөрмәтуллин һәм Чулпан Йосыпова чыгышлары бизәде.