Яр Чаллыда сәгать 16:00дан кичкә кадәр Чулманнан шәһәр мәйданына кадәрге проспект өзлексез драйв зонасына әверелде: 20дән артык интерактив мәйданчык, техник шоулар, патриотик акцияләр һәм йолдызлар чыгышлары меңләгән чаллылыларны һәм кунакларны җыйды.
Бәйрәм программасын «Яшьләр кварталы» ачты, анда шәһәр халкы һәм кунаклары күңел ачу, спорт һәм профориентация зоналары эше белән таныштылар. Интерактив мәйданчыклар эше белән шәһәр мэры Наил Мәһдиев, Россия Федерациясе Федераль Җыелышы Дәүләт Думасы депутатлары Әлфия Когогина һәм Михаил Киселёв, Росмолодёжь Федераль агентлыгы җитәкчесе урынбасары Денис Аширов һәм Татарстан Республикасы яшьләр эшләре министры Азат Кадыйров таныштылар.
Бәйрәмнең төп артефакты булып «Ут-ат» — 2026 елда Россия Федерациясендә Яшьләр көне һәм яшьләр манифестының бердәм символы булды. Быелгы яңалык — киберпространство зонасы, биредә лазертаг һәм Counter-Strike буенча фиджитал-турнир узды, ул полигондагы сугыш сценарийларын виртуаль ярышлар белән берләштерде. Шулай ук кунакларны киберфутбол мәйданчыгы каршы алды. Актив ял сөючеләр БМХ, скейт һәм самокат буенча ярышлар белән экстремаль спорт төрләре фестивален бәяләделәр, анда катнашучыларны күркәм чыгышлар һәм оештыручылардан призлар көтте.
Татарстан Республикасында Хәрби батырлык һәм хезмәт фидакарьлеге елы кысаларында патриотик мәйданчыклар аерым игътибарны җәлеп итте: «Геройлар белән диалоглар» һәм гуманитар ярдәм җыю пункты, анда барлык теләүчеләр очкычсыз очу аппаратларын идарә итү симуляторларын сынап карый алдылар. Профориентация юнәлеше шәһәр предприятиеләренең «Чаллыда эшлә» акциясендә тәкъдим ителде: мастер-классларда кунаклар үзләрен маляр, кирпеч салучы ролендә сынап карадылар, көнкүреш техникасын җыйдылар һәм заводлар буйлап VR-экскурсияләр ясадылар.
Яшьләр өчен Россия студент отрядлары юнәлешләре буенча «Отрядлар стилендә» квесты оештырылды, ә мәктәп укучылары өчен — «Алдынгылар Кубогы 2026» һәм «Барсик-квест» квест-уеннары. «Родные и любимые» шатрында ата-аналар балалары белән бергә кул эшләре ясадылар. Проспект буйлап милли фотозоналар һәм Яр Чаллының 400 еллыгына багышланган зоналар эшләде.
Традиция буенча «Автозвук» мәйданчыгы зур кызыксыну уятты, анда төрле шәһәрләрдән 30дан артык катнашучы аудиосистемалар мөмкинлекләрен күрсәтте, шулай ук «Ночные волки», «Топ карс НЧ», «Маск кар», «Покатушка 4 на 4», ретро-клуб һәм Наиком Техногороды катнашындагы автомототехника күргәзмәсе булды. Кунаклар «КАМАЗ» модель рәте автомобильләре белән рәхәтләнеп фотога төштеләр. «Ночные волки» байкерлары үсмерләр өчен юл хәрәкәте кагыйдәләрен һәм беренче ярдәм күрсәтү кагыйдәләрен кабатлау белән «Курс на безопасность» профилактик мәйданчыгын үткәрделәр.
Сәгать 18:00дә мәйдандагы бәйрәм ачык техник шоу белән дәвам итте. Экстрим сөючеләрне мотофристайл программасы сөендерде, аннан соң заманча техниканы тәкъдим итеп парад сафы белән мото- һәм автоклублар үттеләр.
Сәхнә куелышы шәһәр тарихын һәм казанышларын чагылдырган берничә тематик блоктан төзелгән иде. Кичнең кульминациясе булып «Алдынгылар хәрәкәте» һәм актив халык инициативасы белән оештырылган масштаблы флешмоб булды.
Яшьләргә котлау сүзе белән шәһәр мэры Наил Мәһдиев, Дәүләт Думасы депутатлары Әлфия Когогина һәм Михаил Киселёв, Росмолодёжь җитәкчесе урынбасары Денис Аширов һәм Татарстан Республикасы яшьләр эшләре министры Азат Кадыйров мөрәҗәгать иттеләр. Аларның һәрберсе чаллылыларны котлады, аларның шәһәр һәм ил үсешенә керткән өлешләренең әһәмиятен ассызыклады.
Тантаналы шартларда Наил Мәһдиев һәм чакырылган кунаклар шәһәрнең яшьләр сәясәте активистларына һәм лидерларына лаеклы бүләкләр тапшырдылар. Бәйрәмнең якты музыкаль акценты булып шәһәрнең яшь талантлы артистлары – иҗат конкурслары һәм фестивальләре җиңүчеләренең чыгышлары булды.
Бәйрәм чакырылган йолдызлар чыгышы белән дәвам итте. Кичнең хедлайнеры булып МИА БОЙКА псевдонимы астында чыгыш ясаучы Россия җырчысы, телевизион тапшырулар алып баручысы һәм киноактрисасы Мария Бойко булды.
Музыкаль эстафетаны бәйрәмнең мәгълүмати партнеры – «СТВ-Медиа» холдингы һәм ЭНЕРДЖИ радиосының дискотекасы дәвам иттерде. Пульт артында – Мәскәүдән профессиональ мультиформатлы диджей Александр Егоров. Ул финалга кадәр бию мәйданчыгын хәрәкәттә тотты.
Бәйрәм киче Прибрежный паркы өстендәге күк йөзен яктырткан салют белән тәмамланды.
Бәйрәмнән соң «Шәһәр транспорты» муниципаль унитар предприятие автобуслары бәйрәм кунакларын тугыз юнәлеш буенча өйләренә алып кайттылар.
Бәйрәмнең барлык фотоларын ВК «Яр Чаллы шәһәре хакимияте» төркемендә карый аласыз.
При использовании информации просьба ссылаться на Управление информационной политики и по связям с общественностью.
Җомга, 3 июль 2026, 22:35