Яр Чаллының 400 еллыгына һәм «КАМАЗ»ның беренче йөк автомобиле чыгарылуының 50 еллыгына әзерлек кысаларында Татарстан Рәисе Рөстәм Миңнеханов социаль-мәдәни объектларны ремонтлауга өстәмә акчалар бүлеп бирде. Мондый объектларның берсе булып 45 нче мәктәп булды. Уку йортының капиталь ремонты тәмамланды, һәм учреждение укучылар өчен ишекләрен ачарга әзерләнә. Шәһәр мэры Наил Мәһдиев масштаблы эшләрнең нәтиҗәсе белән танышты.
Капиталь яңартуга 320 млн сумнан артык акча юнәлтелде. Наил Мәһдиев уку елы тәмамланганнан соң Яр Чаллы төзүчеләренең удар темплар белән эшкә керешүләрен билгеләп үтте. Аларның тырышлыгы белән мәктәп яңа уку елы башына заманча кыяфәт алды, укучылар өчен уңайлы шартлар тудыру буенча куелган бурычлар үтәлде.
«Татарстан Рәисе Рөстәм Нургали улы Миңнехановка өстәмә ресурслар бүлеп бирү турындагы карары өчен рәхмәт белдерәм. Аерым рәхмәт төзүчеләребезгә һәм, әлбәттә, ата-аналарга. Бүген без күрдек: ата-аналар, бу матурлыкка һәм башкарылган эшләрнең зур масштабына сокланып, мәктәпкә ярдәм итә башладылар: сыйныфларны юалар, чистарталар. Мәктәп иң заманча кыяфәт алды, һәм без ата-аналар һәм укытучылар белән бергә 45 нче мәктәптә бүген мондый шартлар тудырылуына шатланабыз. Барысына да яңа уку елында уңышлар телибез», – диде Наил Мәһдиев.
1985 елда төзелгән һәм элек капиталь ремонт белмәгән бина танымаслык дәрәҗәдә үзгәрде. Ишекләр һәм керү төркеме яңартылган, түбә һәм фасад төзекләндерү үткәрелгән, барлык инженер челтәрләре: җылыту, су белән тәэмин итү, канализация, вентиляция, электрика системалары тәртипкә китерелгән. Хәзер ишегалды территориясе төзекләндерелә, махсус япмалы заманча төзек мәйданчык барлыкка килде. Ремонтның актуальлеген билгеләп үтәргә кирәк: уку йорты 1 000 тәрбияләнүчегә исәпләнгән, ләкин парталар артында монда 1 100 бала белем ала.
Наил Мәһдиев уку сыйныфларын, актлар залын, шулай ук кече һәм зур спорт залларын карады. Мэр подрядчылар эшләрнең сыйфатын һәр этапта катгый күзәтергә тиешлеген ассызыклады, чөнки объектны тапшырганнан соң алар башкарылган барлык эшләр өчен гарантия җаваплылыгын үз өстенә алалар.
При использовании информации просьба ссылаться на Управление информационной политики и по связям с общественностью.
Җомга, 10 июль 2026, 09:00