Җир һәм мөлкәти мөнәсәбәтләр идарәсенең 2026 елның беренче яртыеллыгындагы төп эш нәтиҗәләре турында җир һәм мөлкәти мөнәсәбәтләр идарәсе башлыгы Ленар Гыйззәтуллин чыгыш ясады.
Алты ай йомгаклары буенча салымнан тыш керемнәр 542 млн сумнан артып, планлы күрсәткечләрне 107%ка үтәгән. Керемнәрнең төп өлеше – 70% – җир участокларын арендага бирү исәбенә формалашты, бу казнага 379 млн сум китерде.
«Яр Чаллы шәһәре җир-мөлкәт комплексын идарә итүнең төп максаты – шәһәр җәмгыяте мәнфәгатьләрендә барлык муниципаль милек объектларының һәм җир участокларының сакланышын, үсешен, нәтиҗәле эшләвен һәм кулланылышын, аларны кулланганнан бюджетка акчаларның максималь керүен тәэмин итү», – дип билгеләде Ленар Гыйззәтуллин.
Керемлелекне арттыру өчен ведомство претензия-гариза эшен актив алып бара. Ярты ел эчендә 162 млн сумга 313 претензия тәкъдим ителгән, ә бурыч 38 млн сумга түләнгән. Шәһәрнең муниципаль милегенең гомуми күләме 60 млрд сумнан артык бәяләнә. Реестрда 276 учреждение исәпләнә. Хисап чорында муниципаль милеккә 326,7 млн сумлык милек кабул ителгән, шулай ук 21 хуҗасыз объект ачыкланган һәм исәпкә куелган. Электрон сату практикасы дәвам итте: сигез җир участогы арендага башлангыч бәясенең 3,4 тапкыр артуы белән бирелгән, ә 47 стационар булмаган сәүдә объекты бюджетка 16,4 млн сум китергән.
Докладта күп балалы гаиләләрне җир белән тәэмин итүгә аерым игътибар бирелгән. Барлыгы участок алуга чиратта 9 583 гаилә исәпләнә. Шуларның 4 440 гаиләсе инде участок сайлаган, ә 358 гаилә акчалата түләүне өстен күргән. Сайлау өчен Зәй, Менделеевск, Сарман, Тукай һәм Минзәлә районнарында төзелгән 1 333 җир участогы тәкъдим ителә.
«Барлык участоклар торак пунктларның гамәлдәге чикләрендә формалаштырыла, кирәкле социаль, транспорт һәм инженер инфраструктурасы бар, аннан соң тоташтыру мөмкинлеге дә бар», – дип аңлатма бирде Ленар Гыйззәтуллин.
Идарәнең калган чорга төп бурычлары – керемнәр буенча планлы биремнәрне үтәү, милекне актуаль исәпкә алу һәм инвентаризацияләү, шулай ук күп балалы гаиләләргә җир участокларын өзлексез бирү.
Мэр төп бурыч – күп балалы гаиләләрне җир участоклары белән тәэмин итү икәнен ассызыклады: «Быел 2 мең җир участогы формалаштырылып, безнең күп балалы гаиләләребезгә тәкъдим ителергә тиеш. Барлыгы бүген исәптә 4 798 гаилә тора. Гражданнарның бер өлеше (358 кеше) акчалата компенсация ала. Компенсация күләме якын арада арттырылырга планлаштырыла, шуңа күрә бу процесс та барачак. Ел ахырына, гамәлдәге динамиканы исәпкә алып, бу 500 гаилә тирәсе булачак. Бүген җир участокларын 4 700гә якын гаилә көтә. Быелгы бурыч – 2 мең күп балалы гаиләне җир участоклары белән тәэмин итү».
При использовании информации просьба ссылаться на Управление информационной политики и по связям с общественностью.
Дүшәмбе, 13 июль 2026, 08:45