Яр Чаллыда «ФормАРТ» округ урам сәнгате фестивале кысаларында төзелгән яңа сәнгать объекты тантаналы рәвештә тәкъдим ителде. Яшьләр инициативаларын хуплау, иҗади үсеш һәм традицион гаилә кыйммәтләрен саклау буенча чаралар «Яшьләр һәм балалар» милли проекты кысаларында гамәлгә ашырыла.
44/17А йорты фасадындагы рәсем шәһәр юбилеена иҗади бүләк булды. Масштаблы эшнең авторы – граффити рәссамы Александр Попов. Аның эскизы Татарстаннан 96 конкурс эшләре арасында иң яхшысы дип танылган. Сюжет үзәгендә – милли ризык әзерләүче әби һәм оныкчык. Композицияне традицион халык орнаментлары тулыландыра, бу Россия халыклары бердәмлеге елында бигрәк тә символик.
«ФормАРТ» проекты Россия Федерациясе Президентының Идел буе федераль округындагы тулы вәкаләтле вәкиле аппараты тарафыннан оештырылган. Муралны ачуда мэр Наил Мәһдиев һәм Татарстан Республикасы яшьләр эшләре министры Азат Кадыйров чыгыш ясадылар. Кунаклар проект логотипларын диварга шәхсән төшерделәр.
Наил Мәһдиев муралның сыйфатын югары бәяләде һәм аны яктырту белән бизәүне тәкъдим итте: «Россия Федерациясе Президентының Идел буе федераль округындагы тулы вәкаләтле вәкиле Игорь Анатольевич Комаровка рәхмәтемне белдерәм. Идел буе федераль округы кысаларында уздырыла торган конкурс – мөһим, кирәкле, яхшы конкурс. Бу урам сәнгате конкурсы. Без бу муралны – чын сәнгать әсәре дип саныйбыз. Рәсем йортны бизәде.
Әгәр кемне дә булса чакырсагыз, кунакларыгызга әйтегез: матур әби белән күркәм оныкчык сызылган йортны ориентир итеп карагыз. Әби оныкчыгына татар аш-суы серләрен тапшыра. Моның өстендә гаилә тора, гаилә өстендә ил тора – өлкәннәргә мәхәббәт, хөрмәт, кечеләргә кайгырту. Бу – теләсә нинди гаиләдә – мәңгелек кыйммәтләр. Бу рәсемгә карагач, матур хисләр уяна. Һәркемдә гаилә, туганнар, якыннар хиссе уяна. Мин дә үз әбиемне искә алдым, ул да тәмле ризыклар пешерә иде – мин дә авылга аңа кайтып йөрдем».
Татарстан Яшьләр эшләре министры Азат Кадыйров проектның яңа буын иҗади үсеше өчен әһәмиятен ассызыклады:
«Бүгенге вакыйга ярдәмендә, бөтен шәһәр Шамил Усманов урамы буйлап узып, бу муралны карарга сәбәп табар дип ышанам. Сез беләсез, ул Россия Федерациясенең 14 субъекты катнашкан Идел буе федераль округының иҗтимагый проекты кысаларында башкарылды. Иң күп тавыш җыйган мурал Идел буе федераль округы буенча беренче урынны алачак, ә автор лаеклы приз алачак. Шуңа күрә Яр Чаллы халкын һәм бөтен Татарстанны тавыш бирүдә актив катнашырга чакырам».
Якын арада тавыш бирү башланачак.
При использовании информации просьба ссылаться на Управление информационной политики и по связям с общественностью.
Чәршәмбе, 5 август 2026, 14:00