Яр Чаллыга эш сәфәре белән Сергей Собянин килде

Бүген Яр Чаллыга Мәскәү мэры Сергей Собянин эш сәфәре белән килде. Сәфәр кысаларында ул Татарстан Республикасы Рәисе Рөстәм Миңнеханов, «КАМАЗ» ААҖ генераль директоры Сергей Когогин, шәһәр мэры Наил Мәһдиев белән бергә автогигантның производство куәтләрен карады, башкала ихтыяҗлары өчен техниканы бәяләде, шулай ук «Адымнар» гимназиясендә булды.

Визит программасы «КАМАЗ» заводына барудан башланды. Рөстәм Миңнеханов һәм Сергей Собянин төп җыю конвейерын карадылар һәм производство хезмәткәрләре белән аралаштылар. Бүгенге көндә куәтләр ел саен монда 60 меңгә якын автомобиль чыгарырга мөмкинлек бирә.

Мәскәү Хөкүмәте «КАМАЗ» ААҖ компаниясенең төп заказчыларының һәм партнерларының берсе булып тора, аның белән компанияне төрле юнәлешләр буенча озак вакытлы һәм үзара файдалы хезмәттәшлек бәйли.

Шәһәр мэры Наил Мәһдиев җитәкчелекне «Адымнар» гимназиясе белән таныштырды. Директор Азат Галиев белем бирү учреждениесе концепциясен тәкъдим итте.

Кунаклар ашханәдәге, актлар залындагы, бассейндагы уңайлы шартларны бәяләделәр.

Китапханәдә Рөстәм Миңнеханов һәм Сергей Собянин укытучылар, балалар һәм аларның ата-аналары белән очраштылар. Татарстанның белем бирү учреждениеләрендә Мәскәү электрон мәктәбе (МЭШ) системасын кертү нәтиҗәләре тикшерелде.

Мәскәү электрон мәктәбе укучылар өчен уку процессларын, укытучылар составы өчен педагогик эшчәнлекне автоматлаштыруны һәм ата-аналар белән мәгълүмати үзара эшчәнлекне тәэмин итүче бердәм цифрлы белем бирү платформасын тәшкил итә. Аңа электрон журнал һәм көндәлек,  Мәскәү электрон мәктәбе китапханәсе, олимпиадалар сервислары, портфолио һәм башкалар керә.

Сергей Собянин Мәскәү электрон мәктәбе системасын якынча 10 ел эшләгәннәрен сөйләде. «Ул бүген дөньядагы иң эре системаларның берсе, һәм сервислар иң алдынгылары – дәүләт системасында аның аналоглары юк», – диде ул. Мәктәп укучылары һәм укытучылар тәкъдиме буенча инде 16 опция кертелгән.

Татарстан Рәисе һәм Мәскәү мэры Мәскәү электрон мәктәбе функционалының уңайлылыгы белән кызыксындылар. Балалар системада укучылар рейтингы күрсәтелүен, бу алар өчен укуда мотивация тудыруын билгеләп үттеләр. Укытучылар программаны планлаштыруда һәм укучыларның бәяләренә комментарий язудагы уңайлыкларны аеруча ассызыкладылар. Ата-аналарга Мәскәү электрон мәктәбе баланың уку процессына контроль итү мөмкинлеген бирә.

Татарстан Республикасы мәгариф һәм фән министры Илсур Һадиуллин бүген республиканың барлык гомуми белем бирү учреждениеләре Мәскәү электрон мәктәбенә тоташтырылганын әйтте. Ул 2023 елда «ТР Электрон белем бирү» дәүләт мәгълүмат системасы составына кертелгән.

Агымдагы елның сентябреннән Мәскәү электрон мәктәбе сервисларын Татарстанның 100 урта һөнәри белем бирү оешмасында эшләтеп җибәрү планлаштырылган. Бүген системада 512 меңнән артык мәктәп укучысы, 955 меңнән артык укытучы, укучы һәм аларның ата-аналары, 92 меңгә якын студент һәм педагог теркәлгән.

Моннан тыш, 2026 елда уку турында белешмәләрне онлайн заказ бирүне кертү һәм имтиханнар һәм олимпиадалар нәтиҗәләре нигезендә сәләтле балалар базасын төзү планлаштырыла, бу аларның алга таба үсеш траекториясен төзү өчен мөһим. Шулай ук ясалма интеллект сервисларын кертү планлаштырылган, алар арасында: «Цифрлы укытучы», «Госпромпт» региональ цифрлы платформасы һәм башкалар.