Тыл хезмәтчәне Зәкия Абдрахман кызы Шәрифуллина үзенең йөз еллыгын билгеләп үтә. Россия Федерациясе Президенты Владимир Путиннан, Татарстан Республикасы Рәисе Рөстәм Миңнехановтан һәм Яр Чаллы шәһәре мэры Наил Мәһдиевтән аңа иң ихлас рәхмәт сүзләрен һәм ныклы сәламәтлек теләкләрен Автозавод районы хакимияте башлыгы Айрат Хөснуллин тапшырды.
Зәкия Абдрахман кызы – гаҗәеп язмышлы кеше. Ул Сарман районы Түбән Бикмәт авылында туган. Башлангыч мәктәпнең дүрт сыйныфын тәмамлаган. Сугышның авыр елларында яшь кыз колхозда төрле эшләр башкаручы булып хезмәт иткән, аннары Түбән Новгород өлкәсенә торф чыгару буенча авыр эшләргә җибәрелгән. Аның тылдагы фидакарь хезмәте Бөек Җиңүгә бәяләп бетергесез өлеш булган.
1957 елда ул Мөдир Гыйльмулла улына кияүгә чыккан, һәм алар бергә Сөлек авылына күчеп киткәннәр. Лаеклы ялга чыкканчы Зәкия Абдрахман кызы колхозда намуслы һәм тырыш хезмәт иткән. 1997 елда зур Шәрифуллиннар гаиләсе Яр Чаллыга күчеп килгән.
Юбилярның төп бүләге һәм горурлыгы – ул зур һәм тату гаилә. Тормыш иптәше белән алар дүрт бала үстергәннәр. Бүген Зәкия Абдрахман кызы кайгырту һәм мәхәббәт белән чолгап алынган: аның җиде оныгы һәм ун оныкчыгы бар.
Батыр хезмәте өчен ул «1941 – 1945 еллар Бөек Ватан сугышында фидакарь хезмәте өчен» медале һәм күпсанлы юбилей медальләре белән бүләкләнгән.
При использовании информации просьба ссылаться на Управление информационной политики и по связям с общественностью.
Чәршәмбе, 26 август 2026, 08:00