Депутатлар алдында Башкарма комитет җитәкчесе урынбасары – финанс идарәсе башлыгы Светлана Мулюкова доклад белән чыгыш ясады. Төп үзгәреш буларак, казнага шактый күләмдә башка бюджетара трансфертлар керү көтелә, алар шәһәр инфраструктурасын һәм җәмәгать транспортын модернизацияләүгә юнәлтеләчәк.
«Карар проекты белән бюджетта өстәмә акчаларны исәпкә алу тәкъдим ителә. Аерым алганда, 500 млн сум трамвай паркының беренче комплектлык вагоннарын модернизацияләүгә һәм тележкаларны капиталь-торгызу ремонтына юнәлтергә тәкъдим ителә. Тагын 990,5 млн сум тышкы төзекләндерү объектларын төзү һәм ремонтлауга каралган булачак», – дип билгеләп үтте үз чыгышында Светлана Мулюкова.
Бюджет кодексына яраклы рәвештә, бу акчаларны бирү өчен шәһәр бюджетыннан тиешле субсидияләр каралачак.
«Кертелә торган үзгәрешләрне исәпкә алып, Яр Чаллы бюджетының 2026 елга гомуми параметрлары түбәндәгечә булачак: керемнәр буенча – 26,7 млрд сум, чыгымнар буенча – 27 млрд сум», – дип ассызыклады финанс идарәсе башлыгы.
Шәһәр мэры Наил Мәһдиев Татарстан Рәисе Рөстәм Миңнехановка мөрәҗәгать игътибарсыз калмавын хәбәр итте: быел трамвай паркын яңартуга 500 млн сум бүлеп бирелгән. Мэр сүзләренчә, бу программаның башы гына – барлыгы 66 вагонны яңартырга кирәк:
«Быел без 11 трамвайны яңартырга планлаштырабыз. Без беренче комплектлык вагоннарын җитештерә торган Беларусьның «Белкоммунмаш» заводы белән контракт төзедек. Без беренче комплектлык трамваен сатып алабыз – утыргычлары булган әзер вагон, әмма тележкасыз. Тележкаларны без капиталь ремонтлыйбыз, заманча җиһазлар урнаштырабыз. Беренче комплектлык бер вагонның бәясе – 40 млн сумнан аз гына артык, бу яңасыннан ике тапкыр арзанрак. Бу бюджет, дәүләт акчалары. Безнең бурыч – шундый ук сыйфатка ирешү, әмма дәүләт акчаларын бик сак тоту. Бу тәҗрибә илдә дә, Белоруссиядә дә уңышлы кулланыла».
Китерү графигы түбәндәгечә: октябрьдә – 4 вагон, ноябрьдә – 4, декабрьдә – 3. Татарстан Рәисе Рөстәм Миңнеханов трамвай юлларын һәм контакт челтәрен капиталь ремонтлауның башлангычына 1 млрд сум бүлеп бирергә карар итте. Наил Мәһдиев аңлатканча, трамвай хуҗалыгы – бу юллар, рельслар, шпаллар, контакт челтәре һәм тарту электр подстанцияләре. Юлларны, контакт челтәрен һәм тарту подстанцияләрен капиталь ремонтлауга һәм реконструкцияләүгә 2027 елда керешергә планлаштырыла. Бу максатларга якынча 9 млрд сум кирәк булачак, һәм эш этаплап алып барылачак.
Наил Мәһдиев өстәп әйтте: юбилей чараларына әзерлек кысаларында Татарстан бюджетыннан бүлеп бирелгән өстәмә акчалар шәһәр инфраструктурасын яхшыртуга юнәлтеләчәк. Шуңа бәйле рәвештә Яр Чаллы бюджетының параметрлары чыгым өлешен арттыру ягына үзгәрә. Шәһәр Советы депутатлары тәкъдим ителгән үзгәрешләрне бертавыштан хупладылар.
При использовании информации просьба ссылаться на Управление информационной политики и по связям с общественностью.
Чәршәмбе, 23 сентябрь 2026, 10:40