Яр Чаллы меңләгән беренче курс студентларын «Время молодых» фестивалендә берләштерде

«Время молодых» фестивале берьюлы республиканың тугыз шәһәрендә беренче тапкыр үткәрелде: Казан, Яр Чаллы, Түбән Кама, Әлмәт, Бөгелмә, Алабуга, Чистай, Яшел Үзән һәм Лениногорскида. Чара 40 меңнән артык катнашучыны берләштерде.

Бәйрәм чаралары шәһәрнең төп мәйданы – Азатлыкта җәелдерелде. Студентларны яшьләр сәясәте учреждениеләре һәм иҗтимагый партнерларның күргәзмә зоналары һәм интерактив мәйданчыклары каршы алды. Беренче курс студентлары Яр Чаллының әйдәп баручы предприятиеләре вәкилләре белән аралаштылар, мөмкин булган стажировкалар һәм таләп ителә торган һөнәрләр турында белделәр, шулай ук квестлар, викториналар һәм интерактив шөгыльләрне дәртләнеп үттеләр.

Бәйрәм атмосферасын «Шатлык» яшьләр үзәге иҗат коллективлары һәм шәһәрнең студент командалары катнашында концерт программасы дәвам итте. Бәйрәмнең кульминациясе булып Башкарма комитет җитәкчесе Фәрид Салаховның чыгышы торды, ул яшьләргә шәхсән мөрәҗәгать итте.

«Беренче курс студенты көне кысаларында узучы “Время молодых” фестивале катнашучыларын сәламләүемә шатмын. Студент еллары – яңа белемнәр, тәҗрибә, танышулар һәм беренче җитди казанышлар белән тулган үзенчәлекле чор. Татарстан Республикасы безнең яшьләр укый, үсә, иҗат һәм спорт белән шөгыльләнә, шулай ук икътисадның төрле тармакларында үзләрен тормышка ашыра алсын өчен барлык шартларны тудыра. Без алга таба да һәр студентыбыз өлкән тормышка ышанычлы адым ясасын өчен бу мөмкинлекләрне бирәчәкбез», – дип ассызыклады  Фәрид Салахов.

Фестиваль катнашучыларын Татарстан Республикасы Рәисе Рөстәм Миңнеханов видеоконференцэлемтә режимында сәламләде:

«Фестиваль республиканың төрле шәһәрләре һәм районнары мәйданчыкларында җәмгыятебезнең иң актив өлешен – ун меңләгән студент һәм укучыны берләштерде. Бүген бөтен Татарстан Беренче курс студенты көне кысаларында чаралар үткәрә. Бу көн студентлык башлануны – һәр кеше тормышында иң үзенчәлекле этапларның берсен, кыю идеяләр, чын дуслар һәм беренче зур җиңүләр вакытын символлаштыра. Сезне матур бәйрәм белән котлыйм! Күпләрегез сайлауларда беренче тапкыр катнаштыгыз. Бүген сез безнең зур илебез, туган республикабыз һәм үзегезнең киләчәгегез өчен тавыш бирдегез. Авыр вакытта Татарстан яшьләренең бердәм булып калуы һәм актив тормыш позициясе күрсәтүе сөендерә. Сезнең энергиягез, сәләтләрегез һәм кыю идеяләрегез бүген туган Татарстанның һәм бөек Россиянең үсеш нигезләрен формалаштыра. Алда сезне ачышларга һәм яңа шәхси җиңүләргә тулы вакыт көтә. Белегез: сез һәрвакыт безнең ярдәмгә таяна аласыз! Һәрберегезгә бәхет, сәламәтлек һәм укуда уңышлар телим. Кичегез яхшы үтсен!».

Бәйрәм актив катнашучылар арасында бүләкләр уйнату белән дәвам итте. Кичә «Нур» яшьләр үзәгеннән «Все свои» музыкаль квартирнигы белән тәмамланды, ул студентларга җылы эмоцияләр һәм яңа танышулар бүләк итте.