Бүген «Көнбагыш» балалар бакчасында татар теле буенча «Белем хәзинәсе» VI төбәк олимпиадасы узды. Чарада жюри әгъзасы буларак Татарстан Язучылар берлеге рәисе урынбасары, Татарстан Язучылар берлегенең Яр Чаллы бүлекчәсе җитәкчесе, Бөтендөнья татар конгрессының Яр Чаллы җирле оешмасы җитәкчесе, Г. Тукай исемендәге Дәүләт премиясе лауреаты Факил Сафин катнашты. Язучы балаларга бүләк итеп китаплар тапшырды.
Олимпиаданың беренче турында яшь катнашучылар «Минем шәҗәрәм» темасына видеовизиткалар тәкъдим иттеләр. Чарада барлыгы 65 бала катнашты, аларның 30ы икенче турга узды. Катнашучылар географиясе Яр Чаллы, Минзәлә, Алабуга һәм Тукай районын колачлады.
Икенче турда балаларга язма биремнәр үтәргә тәкъдим ителде: график диктант язу, рәсемнәрдән антоним сүзләр табу, әкияткә туры килгән атрибутларны билгеләү, шулай ук мәгънә буенча артык рәсемнәрне ачыклау. Катнашучылар сорауларга җавап биреп, халык авыз иҗатын белүләрен һәм рәсемнәр буенча татар телендә җөмләләр төзү күнекмәләрен күрсәттеләр.
Жюри әгъзалары йомгакларны чыгарган арада педагоглар балалар өчен өстәл уеннары оештырдылар. «Көнбагыш» балалар бакчасы тәрбияләнүчеләре «Челтәр элдем читәнгә» татар халык уенын тәкъдим иттеләр. Яшь тәрбиячеләрнең татар биюе белән чыгышы чараның мәдәни программасының өлешенә әверелде.
Олимпиада йомгаклары буенча һәр катнашучы төрле номинацияләрдә билгеләп үтелде. Иң күп балл җыйган балалар 1 нче, 2 нче һәм 3 нче урыннарны алдылар.
Олимпиаданың төп максаты – мәктәпкәчә яшьтәге балалар арасында татар сөйләмен үстерү һәм популярлаштыру. Жюри әгъзасы Факил Сафин чараның мөһимлеген ассызыклады, аның зур миссиясен билгеләп үтте һәм барлык катнашучыларга, аларны әзерләгән тәрбиячеләргә һәм оештыручыларга рәхмәт белдерде.
При использовании информации просьба ссылаться на Управление информационной политики и по связям с общественностью.
Җомга, 30 октябрь 2026, 15:49